Sugilanon: Talagsong sulagma

ALAS 4:15 sa hapon. Mibiya si Elmo sa ilang balay sa Guadalajara, dala ang ilang kotse, aron pagkuha sa iyang apo nga si Hera sa eskuylahan. Nahibilin ang iyang kapikas nga si Lydia nga nagkurikuri sa kusina. Alas 4:30 ang tingpamuhi ni Hera sa eskuylahan nga naa ra sa atbang sa Kapitolyo. Kinse minutos ra ang biyahe, maong alas 4:15 ang iyang paggikan.

Paghiabot niya sa tunghaan wa pay mga bata nga nanggawas. Nahibulong si Elmo. Nahibulong si Elmo. Nangutana siya kang Sidra, ‘lady guard’ sa tunghaan, bahin niini.

“G-extend ilang klase ngadto sa alas singko-imedya, kay sunod semana dunay duha ka adlaw nga way klase,” matod ni Sidra.

Nakapanghupaw si Elmo, kay pul-anon siyang pagka tawo. Dali kaayong laayan kon way buhaton. Unya maghuwat pa siyag usa ka oras. Kapaulion siya, apan gianugnan siya sa gasolina sa pagbalik-balik. Nakahukom siya nga maghuwat na lang. Bug-at ang iyang mga lakang nga mikanaog sa ‘basement’ sa bilding sa tunghaan diin na-parking ang kotse.

Pagka taudtaod nakahunahuna si Elmo og guwatsi. Seguradong mabalaka gyud si Lydia nganong nadugay siyag uli. Iyang tawgon si Lydia sa selpon ug komedyahan nga nadisgrasya ang ilang apo. Gusto niyang pakuyawan ang iyang kapikas. Giukab niya ang ‘glove compartment’ sa kotse nga gibutangan niya sa iyang selpon.

Duha pa ang ilang apo ni Lydia. Kinamaguwangan si Hera, 8 anyos, naa na sa Grade 2. Ang mangod, si Lira nga 4 anyos, ipon sa ginikanan nga sila si Jude ug Shirley, nga mag magtutudlo sa publikong eskuylahan sa Sibonga. Kada ‘weekend’ da makita ni Hera ang iyang papa ug mama. Bugtong anak si Shirley nilang Elmo ug Lydia. Dinhi pa-eskuylaha si Hera sa siyudad sa Sugbo, kay ang iyang papa ug mama di ganahan sa mga tunghaan sa lungsod. Busa gipaipon si Hera sa mga apuhan. Ang lolo nahimong drayber nga maghatod-kuha sa bata sa eskuylahan, ug ang lola nahimong yaya ug ‘tutor’ sa bata, Mga retiradong magtutudlo sila si Elmo ug Lydia. Nalipay sila nga gipa-atiman sa apo.

Wa mahinayon si Elmo sa pagkomedya sa iyang kapikas, kay dihang giukban niya ang ‘glove compartment’ wala didto ang iyang selpon. Nahibilin diay sa balay. Unya pagka alas singko-imedya gibuhian na ang mga bata. Gipasakay dayon niya si Hera sa awto aron mamauli na sila.

Paghiabot nila sa garahe namatikdan ni Elmo nga mingaw ang balay. Pagsulod nila nakita ni Elmo nga naghigda sa ilang lawak si Lydia. Nangluspad kini ug gipaningot, daw gi-nerbiyos.

“Naunsa man ka?” ni Elmo nga gibatig kabalaka sa hitsura sa kapikas. Gibira ni Hera ang kamot sa iyang Lola ug miamen.

“Hapit ko atakeha sa kasingkasing sa kakuyaw! Nipahuway lang una ko kay grabe ang akong kakulba!” ni Lydia.

“Ngano man?” ni Elmo.

“Pagtaod nakog ‘regulator’ sa tangke sa LPG nga bag-o nimong pinalit, nisirit kinig kusog kaayo. Abi gyud nakog mobuto!” ni Lydia.

“Unya giunsa man nimog paundang ang sirit?” ni Elmo.

“Gitangtang nakog dali-dali ang regulator!” ni Lydia.

“Unsa man kaha tong orasa dihang nisirit ang tangke?” ni Elmo. “Alas singko gyud to, kapin kun kulang,” ni Lydia.

Nahimut-okan si Elmo. Midali siyag gawas sa lawak. Nahinumdom siya nga mao tong orasa kanus-a nakahunahuna siyag komedya sa iyang asawa. Maayo gani kay nalimtan niya ang iyang selpon. Apan talagsaong sulagma nga sa oras nga gikuyawan na si Lydia, mao sab kini ang oras nga nakahunahuna si Elmo nga pakuyawan ang iyang kapikas. Nagbasol siya sa iyang nahunahunaan, kay simbakog nabuhat pa, delikadong mahinayon nga atakehon si Lydia sa kasingkasing. Nakahukom si Elmo nga wad-on na niya ang iyang pagka guwatsinanggo. Ug pailisan niya sa iyang gipalitan ang LPG. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph