KUYAW na kaayo rong panahuna kay bisan ang nag-edad pa og 20 anyos kapin mahimo nang ma-stroke. Dinhi nimo makita sa Facebook ang mao nga mga hitabo tungod sa mga post.
Na-shock gani ko kay duna koy kaila nga namatay mga duha ka buwan na ang nakalabay. Slim kaayo siya ug nag-promote og healthy living. Ang iyang bana nga akong higala mohisgot parte sa iyang misis. Mao nga na-shock na lang ko nga namatay tungod sa stroke. Sama sila og namatyan sa among kauban nga si Olga Aledo-Campaña niadtong Enero sa miaging tuig. Silang duha managhigala, susama og physical profile mao makakugang ang ilang kamatayon. Sa mga pagtuon, numero unong trigger sa stroke mao ang stress.
Sa mga pagtuon, ang taas nga oras sa trabaho di makaayo. Sagad mopaminos sa imong productivity ug maka-stress. Kon di makainutil nimo, makapatay. Hayan tungod ni sa paspas nga lifestyle ug stressful nga environment. Usa niani ang social media, diin daghan ang negative.
Pun-an pa ni sa di maayong mga pagkaon, sagad fastfood, mao na nga bisan sa kabatan-on, mamatay na ang tawo sa stroke. Kaniadto, mga hamtong ra ang maigo sa stroke, labina sa 40 anyos kapin.
Usa ka higayon, dunay managhigalang nagtrabaho og call center. Nag-estorya sila parte sa ilang health. Ang usa nihisgot nga 28 anyos pa siya, pero duna na siyay maintenance nga tambal alang sa high blood. Kabata pa. Pero sa tinuod lang, 26 anyos ko dihang ang akong blood pressure moabot na og 130/90 o 140/90.
Mao tong mga panahuna nga doble ang akong trabaho, wa na koy pasingot.
Lifestyle
Usa ray tambag sa doktor: pasingot. Wa ko niya resitahi og tambal kay ako man siyang gisultihan nga moubos ra og balik dayon. Tuod man, sa nagsige na kog hakot og tubig sa amoa kaniadto, ang akong blood pressure nibalik sa normal.
Nawagtang ang akoang panagsa nga allergies ug panakit sa lutahan matag kaon nako og monggos ug batong. Sa akong edad, lisod tuohan niadto nga nagpamati na ko og ingon niadto. Pasingot ra diay ang gikinahanglan.
Daghan ang maayong epekto sa imong panglawas sa pasingot, gawas sa pagkuha sa toxins gikan sa imong system.
30 minutos
Base usab sa mga pagtuon, ang 30 minutos nga pag-ehersisyo matag adlaw dako na kaayo og epekto sa panglawas. Kon makagahin ta og average nga usa ka oras sa social media, nganong di man sa pag-ehersisyo?
Kon ikaw ginikanan, mas maayong ma-example ka sa imong mga anak sa pagpuyo og maayo nga lifestyle, labina sa pag-exercise. Mas sayon ug barato ang exercise. Mahal ang doktor ug tambal, labina ospital.