Binasi sa 1 Hari 19:16, 19-21; Salmo 16; Taga-Galacia 5:1, 13-18; Lucas 9:51-62
MAY misulat nga ang dakong problema sa Simbahan kuno mao “ang pagwali mahitungod sa pasaylo nga wala manginahanglan og paghinulsol, pagbunyag bisag walay pagpatuo sa pagtulon-an sa Simbahan, pagpangalawat bisag walay pangompisal”. Gitawag niya kini og “barato nga grasya, grasya gawas sa pagkadisipulo, sa krus, ug gawas kang Jesucristo”. Mahimo nato ning tawgon og “barat nga grasya”.
Ang manunulat mao si Dietrich Bonhoeffer, usa ka Luteran nga teyologo nga Aleman nga mingkontra kang Hitler. Sa kataposan gipapatay siya niini. Wala niya panumbalinga ang mga higayon nga makaeskapo unta siya. Dili barat nga grasya ang nagtukmod kaniya.
Sumala ni San Lucas, si Jesus “nakapunting na ang iyang panagway sa pag-adto sa Jerusalen”. Larawan kini sa usa ka desidido kaayo nga tawo. Walay makahunong kaniya pag-adto sa Jerusalen ug pagdawat nga gawasnon sa kamatayon nga iyang atubangon didto. Wala kini magpasabot nga mamugos si Jesus nga ang mga tawo mosunod kaniya. Gani gibadlong niya ang managsuong Santiago ug Juan nga buot gabaan ang mga Samaritanhon nga misalikway kang Jesus.
Apan, sa laing bahin, dili pod barato ang pagsunod kaniya. Sa usa nga miboluntaryo pagsunod kaniya, miingon si Jesus: “Ang mga milo adunay mga lungib ug ang mga langgam sa langit adunay mga salag, apan ang Anak sa Tawo walay kapahilunaan sa iyang ulo”. Giingnan pod niya ang buot molubong usa sa iyang amahan: “Pasagdi ang mga patay paglubong sa ilang kaugalingong mga patay”. Sa ikatulo: “Walay tawo nga naggunit na og daro ug magpunay og lingi nga angayan sa gingharian sa Dios”.
Dili barat nga grasya ang pagsunod kang Jesus. Kinahanglan desidido, kugihan, ug dili magpalingpaling.
Kining makusganong tawag sa pagsunod sa Ginoo nasinati ni propeta Eliseo diha sa unang libro sa mga hari. Mihangyo siya nga manamilit usa sa iyang ginikanan usa siya mosunod kang Elias. Gitugotan siya ug giapil niya ang pagpatay sa iyang mga baka aron wala na siyay balikan pa nga panghinabuhi.
Managsangka ang Espiritu ug ang mga kahilayan sa lawas. Dili kini sila mahimong manag-uban, sumala pa sa sulat ngadto sa mga taga-Galacia. “Dili mahimong paandayonan ang nagsugtohan,” sumala ni Pablo.
Ang barat nga grasya paandayonan ang gibati bisag sukwahi sa kabubut-on sa Dios. Mao kini ang dagan sa kalibotan karon: barat nga grasya. Ang paborito natong linya: “Kung saan ka masaya te, suportahan ta ka”. Sa atong tan-aw, taga suporta lang ang Dios sa atong buot himuon bisan pag sala kini. Nabaga na ang atong nawong mahitungod sa kahilayan sa lawas. Dili na natural ang atong kinabuhi kay sa atong tan-aw kon unsay atong gibati, mao kita. Mahimong hangyoon ang Dios aron mo-“adjust” sa atong nahunahunaan imbis na kitay mo-“adjust” ngadto kaniya. Gikalimtan na nato ang paghinulsol ug pagbag-o sa kalugalingon. Nabarato ang grasya.
Nawala na ang atong pagka “counter-cultural” kay dili na kita lahi sa kalibotanong kinabuhi. Ang sala, dili na sala. Kon mawala atong pag-ila sa gibug-aton sa sala, mawala pod ang atong pag-ila ug pagdawat sa kaluoy sa Dios, kay ang sala ug ang kaluoy konektado baya.
Andam ba kitang mosalikway sa tanan sa pagsunod kang Jesucristo? O momantener ba kita og barat nga grasya?