SA KAPIN 2,900 ka job order, casuals ug contract of service nga mga trabahante sa kagamhanan sa lalawigan sa Sugbo, 1,043 niini ang lugwayan ang mga kontrata sud sa duha ka buwan ug patungahon sa trabaho sa alas 8 sa buntag sa Hulyo 1.
Si Atty. Manolette Dinsay, miyembro sa transition team ni incoming Governor Gwen Garcia, nibutyag 836 sa mga nagtrabaho sa mga provincial ug district hospitals ingon man Provincial Health Office (PHO) ang i-renew ang mga kontrata, laing 167 sa unang batch nga na-post ang mga pangan sa ubos sa CFI building niadtong Biyernes Hunyo 28 ug dugang 40 ka mga kawani sa ikaduhang batch niadtong Sabado, Hunyo 29.
Si Dinsay nihulagway nga naghinobra ang mga empleyado sa Kapitolyo karon hinungdan nga ila kining kuhaan ug gibasehan nila ang panginahanglanon sa trabaho sa pag-renew sa contractual nga mga empleyado.
“So, we try to as much as possible stick to the size of the plantilla. But if it goes beyond because of perhaps added services in time after the plantilla was formulated years ago, so the increase will be conformed to that size,” pamulong sa manlalaban.
Matod niya, mas daghang temporaryo nga mga empleyado nga nadestino sa mga ospital ang ilang i-renew ang mga kontrata kon itandi sa non-medical nga mga kawani gumikan sa panginahanglanon sa ilang mga trabaho.
Gipaagi nila sa mga chief of hospital ang pagpahibawo sa mga empleyado sa mga ospital kansang mga kontrata lugwayan samtang sa mga department head sa mga nagtrabaho sa Kapitolyo.
Si outgoing Provincial Information Officer Ainjeliz dela Torre unang niingon moabot sa 2,922 ka temporaryo nga mga empleyado nga mapupos ang mga kontrata karong Dominggo, Hunyo 30, 2,296 ang JO ug COS samtang 626 ang mga casual.
Ang mga ngan nga wa maapil sa listahan sa transition team gitambagan nga dili na motunga sa ilang trabaho sa Hulyo 1.
Sa Hulyo 1, ang mga empleyado nga nadestino sa Kapitolyo nga naa sa listahan, paadtuon sa buhatan sa transition team sa ikaduhang andana sa Capitol building diin padad-on kini sa ilang kasamtangan nga ID ug 1X1 picture. Samtang kadtong naa sa mga ospital, adto sila molahos sa mga tambalanan diin sila nagtrabaho.
Samtang gibutyag ni Dinsay nga nimando si Garcia sa permanente nga mga empleyado nga nadestino sa laing mga buhatan nga mo-report sa ilang mother unit. Si Garcia unang nipasalig nga way padrino system ug ipasubay sa estrikto nga pagtuman sa qualification standards sa Civil Service Commission ang pagdawat sa iyang administrasyon og mga aplikante sa trabaho sa kagamhanan sa lalawigan sa Sugbo.
Si Garcia nipaneguro niini human si outgoing Provincial Administrator Mark Tolentino ug kanhi Human Resource Management Officer Bonifer Nacroda nipahinumdum sa iyang administrasyon nga motuman sa taas nga standards nga gitakda sa lalawigan sa pag-hire og mga aplikante ug dugay na nawala ang padrino system sa Kapitolyo.
“That as we scrutinize each and every regular appointment existing, such qualification standard will be the barometer of whether or not your tenure should continue,” pasalig ni Garcia.