ORMOC CITY, Leyte -- Bisan pa og nag-uwan, wa kapugngi ang mga tawo sa pagtan-aw sa Ormoc City Fiesta Culminating Concert, gabii, Sabado, Hunyo 29, 2019.
Ang maong culiminating concert gipahigayon sa Ormoc City Plaza nga nagsugod pagka alas 7 sa gabii.
Si Police Colonel Armel Gongona niingon nga naa sa kapin 30,000 ang mga nisaksi sa maong aktibidad.
Mismo si Bamboo ang nikanta atubangan sa daghang mga tawo.
Sa wala pa si Bamboo, nalingaw una ang mga tawo sa pipila ka mga pasiaw sa ubang guest.
Gipaila-ila usab pagbalik ang top five sa Miss Ormoc 2019 alang sa mga wala makakita sa maong beauty pageant sa miaging Biyernes sa gabii.
Pasado alas 8 nagsugod na sa pagtaligsik apan dali nga nakaabli sa ilang mga payong ang mga nanan-aw.
Ang uban nipasilong lang sa tent nga gibutang sa local government unit (LGU) Ormoc.
Wa nabungkag ang pundok sa mga tawo hinuon mas nisamot pa kini og kadaghan sa pag abot ni Bamboo.
Kauban niini si Ormoc City Mayor Richard Gomez, Congresswoman Lucy Torres - Gomez, anak nga si Julliana ug ubang opisyal sa LGU ingon man mga miyembro sa Fiesta Executive Committee.
Usa sa gihangyo ni Mayor Gomez sa mga nanan-aw nga dili magpataka sa paglabay sa basura ug pabiling limpyo ang dakbayan human sa concert.
Gisunod dayun ang countdown sa fireworks display.
Migrabe ang siyagit sa mga tawo sa dihang nigawas na ang giatangan nga si Bamboo nga misugod sa pagkanta sa iyang mga sikat nga awit.
Matud sa kapulisan, generally peaceful ang Ormoc City gikan sa pagsugod sa mga aktibidad hantud sa adlaw sa fiesta. (SunStar Cebu)