P.7-B 'shabu' nasakmit sa panahon ni Garma

GIHULAGWAY sa hepe sa Police Regional Office Central Visayas nga si Police Brigadier Debold Sinas nga malampuson ang kapulisan sa Dakbayan sa Sugbo sukad milingkod sa katungdanan si Police Colonel Royina Garma niadtong Hulyo 1, 2018.

Sa datos nga gihatag sa Cebu City Police Office gikan Hulyo 1, 2018 hangtod Hunyo 24, 2019, miabot sa 89 kilos 916.6 gramos nga gituohang shabu ang nasakmit sa kapulisan nga mobalor ang tanan sa P691,479,930 human gihingusgan ang kampanya batok sa ilegal nga drugas.

Nakasikop sila og 2,134 ka mga drug user ug 2,054 ka drug pusher sa 2,991 ka anti-drug operation atol sa pamunoan ni Garma.

Siyam ang napatay sa police operation diin unom niini drug pusher ug tulo ang user nga giingong misukol sa mga operatiba.

Ang labing dako nga nasakmit sa kapulisan niadtong Marso 4, 2019 sa Barangay Inayawan diin nakasakmit sila og 18 kilos sa gituohang shabu nga mokantidad sa P122,400. Ilang nasikop ang 31-anyos nga si Elymar Ancajas lumad nga taga Barangay Jugan, lungsod sa Consolacion, Sugbo.

Matud ni Garma nga sa iyang paglingkod isip pangulo sa kapulisan sa Dakbayan sa Sugbo, problema na kaayo ang drugas.

Iyang gitug-an nga dili mahimong piyongon ang iyang mga mata sa maong matang sa problema ug kinahanglan na sila molihok aron puhagon kini.

Nagpasalamat usab siya sa suporta nga gihatag sa Kampo Crame ug ni Sinas bisan sa kagamay ra sa abag sa kagamhanan sa Dakbayan sa Sugbo.

“Pinakita lang namin through law enforcement that something is wrong already dito sa city and we do not want na maging malala 'yon. Nakita mo with the support ng national headquarters, especially our regional director, si sir Sinas, despite na hindi masyado sa LGU (local government unit) part, ginawa pa rin trabaho namin,” Matud ni Garma.

Taliawala sa kalampusan nga nakuha ang kapulisan sa siyudad sa Sugbo daghan usab sa iyang mga personnel ang napasakaan og kaso tungod sa ilang trabaho.

Gihulagway hinuon niya nga ang volume sa drugas nga nakuha sa kapulisan dili kini alang sa Dakbayan sa Sugbo sanglit gihimo lang hagbonganan ang dakbayan.

“Alam mo hindi naman 'yan drugs intended for Cebu City lang. It's also intended ng mga towns like Talisay and nearby cities. It so happened lang na nasagip natin, sa Cebu City nadadaanan,” dugang ni Colonel Garma.

Nakadayeg pag-ayo si Police Brigadier General Debold Sinas sa performance ni Colonel Garma ilabi na sa kampanya batok kriminalidad ug drugas.

Ang accomplishment nga nakuha sa Police Regional Office Central Visayas, 60 percent niini nakuha sa kapulisan sa Dakbayan sa Sugbo.

“For the whole of Cebu, with our collaborative efforts sa 100 percent na recovery, 60 percent ng recovery is Cebu City alone. Siya ang pinakadakong performance,” matud ni Sinas.

Iyang gigradohan ang kontrobersyal nga Cebu City director og perfect score tungod sa maayong labok niini isip hepe sa usa ka dakong siyudad.

Atol sa oathtaking ceremony sa Plaza Sugbo nahimong sama sa celebrity ang babaying CCPO director tungod sa kadaghan sa magpahulagway kaniya.

Si Garma mobiya Lunes, Hulyo 1 sa Dakbayan sa Sugbo paingon sa kaulohan aron atimanon ang lain niining trabaho nga mao ang pagka-General Manager sa Philippine Charity Sweepstakes Office.

Masaligon si Garma sa mohulip kaniya nga si Police Colonel Gemma Vinluan nga mapadayon ang iyang nasugdan nga programa ug ang pagpadayon sa paggukod sa mga durugista sa Dakbayan sa Sugbo. (Superbalita Cebu)