NAGTINGKAGOL karon sa selda ang duha ka tawong giingong mangilkilay ug nagpaila pa nga miyembro sa pundok sa mga rebelde.

Sigun ni National Bureau of Investigation (NBI-12) Special Investigator Dominic Cerro nga ang mga dinakpan giila nga sila Mohamad Ali Cano ug Gabriel Sandigan ug pulos taga Sultan Kudarat.

Nadakpan ang duha atol sa entrapment operation human gireklamo sa usa ka negosyante sa sand and gravel sa Alabel, Sarangani Province tungod sa giingong pagpangilkil.

Unang gireklamo ang duha ka mga suspek sa pagsunog sa sakyanan ug opisina sa negosyanteng si Francisco Amantillo kay wala mihatag og salapi kanila.

Sa gilusad nga entrapment operation misuway pa sa pagsibat si Cano hinungdan nga napusilan siya sa tiil.

Sa kasamtangan anaa siya sa ospital samtang ang kauban niini gibalhog na sa selda sa NBI.

Butyag ni Cerro nga gisuta na karon sa NBI kun kinsa ang mastermind sa grupo nga nalambigit sa serye sa pagpanulis ug pagpangikil sa Sarangani Province, Sultan Kudarat, Maguindanao ug South Cotabato. (Edgardo Fuerzas)