NAKURAT ang lokal nga kagamhanan sa Siyudad sa Cagayan de Oro nga sa unang declogging anaa sa 260 ka dump truck nga basura ang nahakot diha sa Bitan-ag creek sa unang gipahigayong declogging.
Naghangyo ang tinugyanan sa City Engineering’s Office nga kun mahimo ilabay sa insaktong labayanan ang mga basura ilabi na nga daghan pang mga basura ang nahipos atol sa labing ulahing declogging niadtong bulan sa Mayo.
Gibutyag ni Engrineer Rolando Pacuribot nga kanunay na nilang gihangyo ang katawhan nga ilabay sa insaktong labayanan ang mga basura gumikan kay usa kini sa mga rason nga nakasinati og pagsaka sa tubig ang siyudad sa panahon nga moulan.
“Naa man ta’y designated nga labayanan sa atong garbage dapat didto na gyud sa designated kay ako lang balikon sa first namo nga pag declogging diha sa Bitan-ag going to Gaabucayan surprisingly 260 ka dumptruck ang among nahakot,” matud ni Pacuribot.
Gidugang pa niini nga daghang mga basura nga nagsagol ang ilang mga nakuha atol sa pag declogging ug gani pila ka bulan nila nga hinakotay sa mga basura.
Giingong wala pa ni-epekto ang pagamit og eco bag tungod kay daghan pang mga botelya sa mineral water ug plastik ang mga naglutaw.
“Dili pa kay bag-o pa nag implement gani to be honest katong bulan sa Mayo nag conduct mi og declogging still daghan pag plastic ug bottled nga mga minerals naglutaw,wala pa tingale mi-epekto,” dugang niini.
Una na nga gibutyag ni Pacuribot nga ubos ang Siyudad sa Cagayan de Oro ug ang tubig gikan sa Bukidnon, Lanao del Sur, ug Lanao del Norte ang masalod sa siyudad hinungdan nga naghangyo nga unta magtinabangay aron nga ma-menusan man lang ang pagsaka sa tubig pinaagi sa paglabay sa basura sa insaktong labayanan.