GISUTA na ang kuha sa closed-circuit television (CCTV) camera diha sa usa ka bangko human gikawat ug gi-withdraw sa wala maila nga suspetsado ang automated teller machine (ATM) sa usa ka babaye niadtong nilabay nga adlaw diha sa dalan Pabayo-Chavez, Siyudad sa Cagayan de Oro.
Ang biktima naila nga si Cheryl Locajo, 40, dalaga usa ka sales lady nga taga Barangay Kauswagan.
Sa nahipos nga impormasiyon gikan sa kapulisan sa Police Station 1 (PS1) sa Divisoria gikabutyag nga gibutang lamang niini ang pitaka sa storage room diin sulod niini ang mga importante nga I.D.
Gidugang pa niini nga nasutang gi-withdraw sa suspek ang kantidad nga P3,000 nga sulod sa maong ATM card diin wala pa masuta kun unsang pamaagi nga naka-withdraw ang wala mailang suspek.
Naghangyo na ang kapulisan nga mangayo og kopya sa kuha sa CCTV camera sa maong bangko aron maila ang nagkuha ug nag-withdraw sa maong ATM card.