NAGPABILIN nga nag-unang top destination ang probinsya sa Camiguin base sa datos sa Department of Tourism (DOT)-Northern Mindanao diin anaa sa 31 porsyento sa total nga arrivals sa unang quarter ning tuig 2019 nga gisundan sa Misamis Occidental sa 23 porsyento ug Misamis Oriental sa 22 porsyento.
Samtang anaa usab sa 15 porsyento sa Lanao Norte ug otso porsyento ang Bukidnon sa total nga anaa sa 481,141 ang tourist arrivals.
Atol sa media forum sa National Economic and Development Authority (Neda) nasayran nga sa datos gikan sa DOT-Northern Mindanao niubos ang ihap sa mga turista kumpara sa unang kwarter niadtong tuig 2018.
Ang mga domestic tourist anaa sa 98 porsyento sa total nga arrivals samtang majority sa mga langyaw o foreign visitors nag-gikan sa North America, East Asia -, ug Europe.
Ang Camiguin kaniadtong tuig 2018 dunay total nga tourist arrival nga 166,269 ug sa tuig 2019 anaa sa 150,004. Ang Misamis Occidental anaa sa 160,161 sa tuig 2018 ug karon anaa na lang kini sa 111,410 samtang sa Misamis Oriental anaa sa 205,570 sa tuig 2018 ug 106,697 na lamang karong tuiga.
Ang Lanao del Norte anaa sa 106,738 ug karon anaa nalang sa 76,725 ug sa Bukidnon anaa sa 94,056 karon anaa nalang sa 39,305.
Niadtong tuig 2018 anaa sa 717, 608 ang domestic tourist samtang karong tuiga anaa na lamang sa 477,455 diin dunay 33.47 porsyento nga pag-ubos samtang sa foreign tourist anaa sa 15,186 kaniadto ug karon anaa na lang kini sa 6, 686 diin dunay deperensiya nga 55.97 porsyento.