GITUBAG ni Misamis Oriental Governor Bambi Emano ang pangutana sa kadaghanan kun ma-release ba ang mid-year bonus nga gipaabot sa mga regular nga empleyado sa Kapitolyo Probinsyal human wala pa kini madawat sa pagsulat niining balita.
Pipila ka mga indibidwal nagpadala og mensahe sa Superbalita Cagayan de Oro Facebook page aron pagpaabot nga mahatagan kini og pagtagad ilabina nga daghan sa empleyado ang gapaabot niini human naandan na sa pamunoan ni Emano nga dili pa matapos ang bulan sa Mayo mahatag kini.
Migawas ang nagkadaiyang spekulasyon nga basin ang pundo niini gigamit niadtong milabay’ng piliay.
"Mahimout ko ana, mid-year paman karon. We have funds. Hopefully we will release it," kini ang pahayag ni Emano dihang gihinabi sa sakop sa prensa atol sa oath-taking ceremony niini didto sa Tagoloan, Misamis Oriental adlawng Huwebes, Hunyo 27.
"Wala may delay. We’re just hopeful we will be able to continue, hopefully if not now maybe December. Pwede man namo na idungan sa bonus para dako ilang makuha sa Christmas. They can get it on Christmas," matud ni Emano.
Usa sab ka reliable source nga empleyado sa Kapitolyo nga nainterbyu sa SunStar Superbalita nihangyo dili magpasulti sa iyang pangalan niingon nga positibo siya nga i-release ang mid-year sa mga empleyado tungod kay bastante ang panudlanan sa Kapitolyo.
Giklaro sab niini ang isyu ug miingon nga wala’y kamatouran ang report nga gigamit kini sa eleksyon.
"Sa pagdagan ni Governor Bambi matag 45 days nga wala siya kay gapokos og kampanya kami ang ga handle sa mga finances ug wala sukad mahitabo nga gakuha na siya og pundo para sa eleksyon. Mokuot kana siya sa iyang kaugalingong bulsa alang sa kampanya," pagklaro niini ug miingon nga iyang nasabtan ang gobernador nga dili tiaw ang unos nga nasinatian human sa kamatayon sa amahan niini.