USA ka lalaki ang namatay human nabangga ang iyang gimaneho nga motorsiklo sa alas 6:10 sa buntag niadtong Dominggo didto sa El Rio Vista Village, Bacaca, siyudad sa Davao.

Namatay mao si Jeogre Arbado, 34, minyo, nagpuyo sa 876 Jacent Street, Jade Valley Subdivision, Barangay Tigatto, distrito sa Buhangin.

Si Police Officer 3 Eligio Najera, traffic investigator sa San Pedro Police Station, nagbutyag nga si Arbado nagmaneho sa Honda XRM nga dunay plate number LL-360 kauban ang iyang asawa nga si Elena Arbado, 32.

Matud ni Najera nga gikan ang magtiayong Arbado sa ilang balay apan dihang miabot sila kanto mga dalang Sampaguita ug Jasmin, El Rio Vista kalit silang nabangga sa walang bahin sa Honda CRV Wagon nga dunay plate number XHZ-358.

Ang maong sakyanan gimaneyo ni Kenneth Angelo Loceo, 18, nagpuyo sa Blk 28, Lot 1, Deca Homes, Barangay Cabantian, distrito sa Buhangin.

Suma sa mga nakasaksi nga maayong pagkalabay sa asawa sa namatay ngadto sa usa ka koral mao nga nakaangkon siya og daghang samad sa kalawasan.

Tungod sa kakusog sa impak sa bangga, pipila ka minuto ang milabay human sa insidente namatay ang si Arbado sigun sa mga paramedics sa Central 911.

Giandam na ang kasong reckless imprudence resulting to homicide and damage to properties sa kapulisan. (AD)