BISAN og asa ka karon sa Mindanao anaa ang daghan kaayong scam, apan unsa ba kining scam?
Buweno sa shortcut nga pagkasulti, pagpangilad pagpanunto o bisag unsa pa’y imong itawag ana nga walay katinuoran.
Usa ka negusyante nga nahimo ko nga suod nga higala adunay dakong negosyo sa Japan ug China, iyang gi-esplikar sa ako nga kining mga scam karon nga mitungha sa atong nasud naa sab kini sa mga nasud sa Europa ug America, ug uban pa, apan di kini kontrolado sa Central Bank.
Kini ang gitawag ug cryptocurrency kuwarta sa hangin nga gidula pinaagi sa computer, kini nag-ugat sa betcoin nga imong paliton, unya imong dulaon hangtud nga moabot og milyon-milyon ang imong kuwarta.
Wala kini kalainan sa slot machine sa Casino nga hulogan nimo og coins tapos dulaon nimo hangtud maka-jackpot ka og milyon-milyon ka pesos.
Sulod daw sa usa ka semana nga dula sa computer, kaya niining mga scam karon nga makuha ang 100 porsyento, sa ato pa, ganansiyado gihapon sila sa 50 porsyento nga ilang gihatag sa mga mo-invest kay sulod man sa usa ka bulan ang ilang gitagal sa pag payout.
Ang delikado lang kun mo-ubos ang kantidad sa betcoin nga gipalit nila og 12 dollars ug kalit nga mo-ubos ngadto sa 3 dollars, mao nanang higayona nga mosibat sila.
Mao nga ang tambag sa akong suod nga higalang negosyante, payin dayon kon bag-o pa sila nag-operate, pagkatapos undang, kay sugal ni siya.
Dili pud nato mabasol ang gobyerno nga paki-alaman ni sila, kay ang ilang gilantaw pag-abot sa tumoy kun magsira kining mga scam karon dili gyud kalikayan nga gobyerno ang atong basulon.
Pero unta i-regulate, kay mao ma’y tumong sa atong gobyerno kaha nga mahibalik ang kuwarta nga ilang gi-invest o gi payin?
Ang nahitabo sa Forex scheme didto sa Butuan City, Caraga Region, nga kini nga scheme gihold-up sa National Bureau of Investigation (NBI), nga matud pa P208,000,000 ang ilang nakuha, pero ang gideklara P23,000,000 lang.
Gusto man kaha sa atong gobyerno nga ipang-uli ang ilang gipuhonan unta, gipasagdan sa NBI nga mahuman og payout sa Forex ang maong kantidad, una nila gipasirad-an kay kuwarta to sa mga tawo nga nangiyawat intawon nga sa labing dali nga panahon motubo ang ilang gamay nga kantidad.
Karon asa paingon kadtong P208, 000,000? Asa kadto dalha sa NBI, sa gobyerno o sa ilang bulsa? Ang atong nakita ning gobyernoha, dili sila gusto nga mo-asenso ang panginabuhi sa atong mga pobre nga katawhan bisag sa hamubo lang unta nga panahon.
Gusto nila nga magkalisud-lisud aron sayon kaayong gawngan pag-abot na sa Eleksyon, kay kon makahatag silag gamatitoy nga kantidad paga-isipon naman nato nga dakong utang kabubut-on sa ila.
Gubok ug dunot gihapon ang sistema sa atong sosyodad hangtud karong panahona.