MALITA, Davao del Sur -- Nanumpa na ang mga bag-ong opisyal sa probinsya nga gilangkuban sa lima ka munisipyo ug gipamunuan sa pamilyang Bautista adlaw’ng Byernes, Hunyo 28.
Dungan nga nanumpa ang mga opisyal sa lima ka munisipyo sa pagpanguna sa mga mayor sama sa Sarangani nga gipamunuan ni Mayor Virgie Cawa, sa Sta. Maria nga si Mayor Rudy Mariscal, sa Jose Abad Santos si Mayor John Jason Joyce, sa Don Marcelino si Mayor Michael Maruya ug sa lungsod sa Malita si Mayor Bradley Bautista.
Ang mga dagkong opisyal sa lalawigan nga gipamunuan ni Governor Claude Bautista, Bise-gobernador Franklin Bautista ug Representative Lorna Bautista-Bandigan, mipasalig nga sa ilang ikaduhang termino, tutukan ang mga proyektong imprastraktura, edukasyon, panglawas, ug panginabuhian.
Gipasiatab ni Bautista-Bandigan nga nakapatukod na siya og mga pasilidad sama sa mini-gym sa mga tunghaan diin anaa na sa 99 porsyento ang nahuman.
Si Governor Bautista nagbutyag nga ang panginabuhian sa ilang mga katawhan mao ang iyang tutukan.
“Livelihood program para sa mga tawo tapos immediate response to the basic needs of our constituents,” asoy sa gobernador.
Gilantaw nga mas paspas ang kalambuan sa probinsya human nadugang ang laing opisyal sa pamilya nga si Representative Claude Bautista kinsa molingkod sa Dumper Partylist.
Giawhag sab sa pamilyang Bautista ang katawhan nga mosuporta sa ilang administrasyon aron sa dili madugay mahimong paspas ang paglambo sa lalawigan.
Gibaharan sab ni Governor Bautista kadtong padayong nagpayuhot sa ginadiling druga.
“Bahala na ang kapulisan unsa’y buhaton sa ilaha basta ang order nako sa kapulisan dead or alive you have to curtail and to stop illegal drugs in Davao Occidental,” asoy ni Bautista.
Sanglit usa ka team sa tanang kandidatong nanagan sa lalawigan ang nagmadaugon, gilauman nga magkahiusa silang tanan sa pagtutok sa kalambuan sa tanang kalungsuran.