ARAKAN, North Cotabato -- Naangol ang usa ka pulis human gipusil sa live-in partner sa iyang kanhi uyab alas 11:10 sa buntag niadtong adlaw’ng Sabado, Hunyo 29, sa probinsya sa Cotabato.
Giila ang biktima nga si Patrolman Chris Manuel, 30-anyos, nadestino sa Cotabato Police Provincial Mobile Force Battalion ug molupyo sa Antipas, North Cotabato.
Gibutyag ni Cotabato Police Provincial Office (CPPO) Public Information Office Chief, Major Julie Lu Melecotones nga miadto ang biktima sa balay sa iyang kanhi uyab nga si Ecel Sajulga sa Barangay Ganatan, sa Arakan aron kuhaon ang ilang 4-anyos nga anak.
Apan miabot ang live-in partner ni Sajulga nga si Ryan Amor, 30-anyos, sekyu ug nagpuyo sa Barangay Amas, Kidapawan City.
Nagkalalis ang tulo gumikan nagdumili si Sajulga nga ihatag ang bata kang Manuel.
Kalit lang giilog ni Amor ang kalibre .45 nga pistola sa pulis ug namusil.
Naigo sa iyang duha ka paa si Manuel samtang miipsot dayon ang suspek paingon sa hilit nga dapit sa Arakan.
Ang biktima daling gisapupo sa mga sibilyan ug sakop sa Citizen Armed Force Geographical Unit (Cafgu) nga nagresponde sa maong dapit ug gidala ang pulis sa Arakan District Hospital apan gibalhin dayon kini sa Kidapawan Medical Specialist Hospital diin luwas na sa makuyaw nga kahimtang.
Sa kasamtangan padayon nga gipangita sa mga awtoridad ang suspek ug gitakda nga pasakaan sa tukmang kaso.