WALA damha sa usa ka karpentero nga katapusang pagpamanday nalang niya sa alas 7:45 ang takna sa buntag niadtong Domingo human nahulog siya sa iyang gipanday nga gambalay didto sa Lizada, Toril, siyudad sa Davao.

Ang biktima mao si Mario Devillares, hamtong ang pangidaron,  minyo, carpenter sa Danvic Construction, lumad nga taga Barangay Aplaya, Digos City ug nagpuyo sa Lizada, Toril.

Ang blotter sa Toril Police Station nagpahibalo nga namanday ang biktima sa atop sa Warehouse 2 building sa Philippine Fruits Corporation apan nadakin-as siya hinungdan nga nahulog.

Mga kauban sa biktima nagbutyag nga maayong pagkapantok 

sa ulo sa biktima mao nga namatay dayon human sa iyang pagkahulog.

Si Senior Police Officer 3 Francisco Paña III, duty investigator, nagbutyag nga walay foul play sa kamatayon sa biktima sanglit kombinsido sila nga wala gituyo ang maong insidente.

Ang patay'ng lawas sa biktima atua karon gihaya sa Angel Funeral Homes samtang giandam sa kabanay ang iyang katapusang pahulayan.

Sa laing bahin, usa ka warehouse ang gilungkab sa wala mailhing mga tawo didto sa De Guzman Street, Toril niadtong Dominggo.

Nadiskubrehan ang maong insidente sa trabahante nga si Joel Antao kinsa maoy nakakita nga naguba ang kandado sa alas 10:30 sa gabii sa warehouse nga gipanag-iyahan ni Virgilio Nolasco Jr.

Nakuha sa mga kawatan ang salapi nga gibutang sa ilang locker nga nagkantidad og P30,000.00.

Naniid na karon ang kapulisan sa maong dapit aron mailhan ug masikop ang mga kawatan. (AD)