ARON makaparang og insakto sa mas dagkong Smart Gilas-RP team, ang M.Lhuillier Kwarta Padala-Cebu Niños ningkuha og import alang sa duha ka exhibition games nga ilang sagubangon karong Marso 4-5 sa Cebu Coliseum.
Ning maong tahas, gikuha sa Niños ni coach Raul “Yayoy” Alcoseba si kanhi PBA import 6’9” Jason Dixon.
Ang produkto sa Virginia Liberty sa NCAA 1 sa USA nakaduwa isip import sa Coca Cola Tigers sa PBA ug siya sab ang nagtabang sa RP Patriots aron maangkon ang labing unang titulo sa Asean Basketball League (ABL).
Si Alcoseba nagkanayon nga kinahanglan gyud nilang mokuha og import nga ilang ikapambato sa ilawom kay dagko gyud kaayo ang mga magduduwa sa Gilas lakip na niini ang produkto sa Cesafi 9-time champion University of the Visayas (UV) Green Lancers nga si 7-footer Greg Slaughter.
Gawas sa opensa, dako gyud kaayo’g ikatabang si Dixon sa depensa ug rebounding alang sa Niños.
Ikatambayong ni Dixon sa opensa sa Niños mao sila si Woodrow Enriquez, Mark Ababon ug ang mga ex-PBA nga sila si Stephen Padilla, Marlon Basco, ug Bruce Dacia.
Ang Gilas ni coach Rajko Toroman magsalig og maayo nila ni Japeth Aguilar, Chris Tiu, Marnel Baracael, ug ang maidlas nga si Andy Mark Barroca.
Ang ubang mga sakop sa Gilas mao sila si Jason Ballesteros, Joseph Casio, Cardo Cawaling, Rafael Jazul, Magi King Sison, Marcio Lassiter, ug Dylan Ababou.
Sa laing bahin, si Toroman mopahigayon og libreng coaching seminar karong Biyernes sugod sa alas 10:00 sa buntag sa nahisgutang venue.