NAGTINGUHA si World Boxing Council (WBC) light flyweight champion Rodel “Batang Mandaue” Mayol (26-4-2. 20KOs) nga makig-rematch kang Mexican Omar Nino Romero (28-3-2, 11KOs) kay gusto gyud niya kining patikangkangon.

Niadtong Dominggo (RP time) sa Mexico, tatawng nagpangagot pa ang ngipon ni Mayol tungod sa low blows nga iyang nadawat gikan kang Romero unya ang naparat pa gyud og samot kay gisukmag gihapon siya niini bisan giuwang na sila sa referee sa 3rd round.

For updates from around the country, follow Sun.Star on Twitter

Puwerteng pagkahagsa ni Mayol niadtong higayuna ug nadeklarar nga technical draw ang ilang away.

Gipasabot ni Mayol nga kon dunay rematch, nagtuo gayud siya nga iyang ma-knockout si Romero tungod kay dili kaayo kusog ang mga kumo niini. Gusto niya nga luyahon una niya og maayo si Romero ug dayon iya kining tumbahon sa uwahing mga round.

Kabahin sa desisyon, nisanong ra si Mayol kay nagpabilin man gihapon kaniya ang iyang bakus apan alang kaniya, mas haom gyud unta kon disqualification pa ang gipahamtang ngadto kang Romero.

Gipasabot ni Mayol nga grabe kasakit ang iyang gibati dihang naigo siya og low blow hinungdan nga wala na niya nabantayan nga nisukmag lang gihapon si Romero kaniya bisan giuwang na sa referee.

Matod ni Mayol nga paingon unta siyang moluksolukso niadtong higayuna apan naigo na man siya sa kumo ni Romero.

Apan alang sa kampo ni Romero, dili makiangayon ang desisyon.

Alang sa promoter ni Romero nga si Hector Garcia, sagol drama ang gibuhat ni Mayol.

“Rodel Mayol is a comedian and just laid on the mat to keep his title without fighting like a champion should. It was all a comedy. Omar was robbed of a legitimate victory,” matod ni Garcia sa interbyu sa www.fighthype.com.