SWERTE. Morag swerte ang taga south district sa dakbayan sa Sugbo karong panahon sa piliay.
Si Mayor Tomas Osmeña abtik mipasalig sa 86 ka pamilya sa Sitio Tambisan, Barangay Tisa nga nasunogan niadtong Martes nga iyang sabuton ang mga tag-iya sa yuta aron mabalayan sa mga biktima sa sunog.
Di nato ikahibung ang mga pasalig ni Mayor Tomas ngadto sa mga biktima sa sunog kay gawas nga siya pa ang mayor, nidagan man gud siya pagka kongresista sa south district sa dakbayan.
Usa ka stratehiya ang gibuhat ni Mayor Tomas aron pagsiguro sa boto sa taga Tisa sa umaabot nga piliay sa Mayo 10. Luoy is Atan Guardo, nga iyang kaatbang sa pagka kongresista, kay di makapanghatag og hinabang.
Pasayloa ko og nahikalimot ko apan di ko makahinumdum nga gitabangan ni Mayor Tomas ang mga biktima sa sunog nga taga north district sa dakbyanan sama sa iyang pagtabang sa mga biktima sa sunog diha sa Tisa.
Daghan na man gud ang kwarta sa dakbayan mao nga si Mayor Tomas nagsige na lang og panghatag kwarta nga morag gikan sa iyang bulsa ngadto sa senior citizens, high school graduates ug bag-ohay lang sa mga huwes.
Gani nanghambog si Mayor Tomas nga sa una niyang lingkod ang dakbayan duna lay pundo nga P14 milyunes apan ang dakbayan karon duna nay P3.19 bilyunes. Ang pangutana, asa man ning kwartaha karon mayor?
Kanang nindot ug hapsay nga dalan diha sud sa SRP di ma na gasto sa dakbayan kay ang kagamhanan sa nasud pinaagi sa Department of Public Works and Highways (DPWH) ang nagpabuhat niana.
Kon atong tan-awon and dakbayan, daghan man gihapon ang kadalanan nga buslot o dautan, dunay mga dapit nga way suga, ang basura nagkatag lang, ang trapiko nagkayagaw kay dautan na ang traffic signals ug kuwang ang mga traffic enforcers.
Kon wa ko masayop kapin na sa 20 anyos ang traffic signal nga gitawag og Scat system sa Citom nga gidonar ug gi-istalar sa kagamhanan sa Australia dinhis dakbayan.
Nganong wa man gi-upgrade sa mayor ang traffic signal?
Tungod sa kakulang sa traffic enforcers midaghan na ang badlongon nga mga drayber labina kadtong sa mga de pasaheroan ug motorsiklo o habal-habal. Dinhi ra sa Sugbo ka makakita og drayber sa motorsiklo nga sugaton ang trapiko.
Hala mayor isige lang og panghambog nang imong bilyunes nga abot sa SRP samtang ang dakbayan hugaw ug nagkaguliyang ang trapiko. Manghinaut lang ta nga ang mosunod nga mayor ayuhon og dala ang dakbayan.
****
TINUOD? Sa nangaging mga ginagmayng linog nga miigo dinhis atong nasud ug sa dakong linog nga nakatumpag sa Haiti ug bag-ohay lang sa Chile, morag mamatuod ang sini nga giulohan “2012”, diin natapos ang kalibutan ning tuiga.
Tungod sa dakong linog sa Chile nga moabot na sa duolan usa ka libo na ang patay, dunay tsunami warning apan ang Sugbo wa maapil. Ang kadtong mga dapit, sama sa Surigao del Sur, nga nag-atubang sa pacifico mao ray naapil sa tsunami warning.
Dili ni panghadlok ang ako apan kon nakakita mo sa sini nga “2012” morag dunay tipik sa kamatuoran ang maong sini sa mga panghitabo ug kalamidad karon sa tibuok kalibutan.
Ang siyensya di motuo nga duna ni kalabutan sa atong pagtuo sa Diyos. Kay alang kanila ang atong kalibutan dunay diperensya o gitawag nga fault line nga inigtuyok sa kalibutan molihok hinungdan nga dunay linog.
Panahon na nga magsugod na tag paghinulsol sa atong mg kasaypanan. Di ni pagtungo, maayo unta kon kadtong mga kurakot maoy maunag kaigo sa linog.
(elespinoza53@yahoo.com)
r