SAMUEL P. RUSIANA
Bato, Samboan, Cebu
USA si Bobby sa gatusan ka pasahero nga motabok ngadto sa isla sa Negros nga natanggong sa pantalan sa Bato tungod sa bagyong Citang. Gipahunong sa ‘coast guard’ ang tanang biyahe sa ‘fast craft’ ug barko human gipaubos sa Signal No. 2 ang habagatang bahin sa Sugbo.
Ang natanggong nga mga pasahero didto gipahiluna sa ‘covered court’ sa barangay Bato samtang nagpalabay sa bagyo. Adunay nanghatag og pagkaon alang sa natanggong nga mga pasahero. Samtang nagkaon siya sa daplin may nakit-an si Bobby nga babaye nga pamilyar niya ang dagway. Kon wala siya masayop si Kathlyn kini, kanhi uyab niya sa hayiskol. Napulo ka tuig na ang nakalabay sukad sa ilang katapusang panagkita. Mibalik sa iyang panumdoman kanus-a sila kanunay magkauban ug magparayganay sulod sa eskuylahan. Nagtuo siya nga sila ang magkadayon, apan tungod sa managlahing dalan nga ilang gisubayan human sa hayiskol nawala ang ilang komunikasyon.
“Hello! Kat, kumusta ka?” ni Bobby nga mitimbaya kang Kathlyn. “Mao lang gihapon. Na-stranded sab diay ka?” ni Kathlyn nga wa magdahom nga magkita sila pag-usab. “Nagtrabaho kos sa DSWD. Busy among opisina kay adunay bagyo.”
“May pamilya na ka?” ni Bobby. “’Single’ pa. Wala may nakagusto,” ni Kathlyn nga mipahiyom. “Ikaw, may asawa na?”
“Wala pa. Ulitawo gihapon!” atik ni Bobby. Dugay sila nga nag-estoryahay. Sukad nagkita pag-usab kanunay na silang nagkontakay ug miusbong pagbalik ang ilang relasyon. Kanunay mag-abot sila Kathlyn ug Bobby sa Dumaguete City sulod sa hotel. Wala magdugay nagsabak ang dalaga. “Nagsabak ko. Mga tulo ka bulan,” tug-an ni Kathlyn.
“No problem. Ulitawo bitaw ko!” pamakak ni Bobby. Pero may kabalaka nga misaog sa iyang galamhan kon unsay iyang buhaton, kay nagsabak usab ang iyang asawa nga si Rita.
Samtang nagkadako ang tiyan ni Kathlyn nagkadako usab ang problema ni Bobby. Naglibog siya umsay buhaton aron masulbad ang iyang problema. Samtang nagsakay sa ‘fast craft’ gikan sa Bato padulong sa Negros nakahukom siya nga moambak sa dagat aron matapos na ang tanan.
“Diyos ko, pasayloa ko sa akong buhaton!” ni Bobby nga nanguros ug mibarog aron moambak sa dagat, apan kalit mitingog ang iyang selpon. Tawag gikan ni Cita, iyang ig-agaw, “Bob, pauli kay si Rita ania karon sa Holy Child Hospital. Naglisod siya pagpanganak.”
Pagdunggo sa ‘fast craft’ nagdali si Bobby nga misakay og bus aron moadto sa ospital. Pag-abot niya sa ospital midiretso siya sa ‘delivery room.’
“Dok, kumusta akong asawa? Nanganak na siya?” ni Bobby nga nabalaka.
“Gikasubo nako. Gihimo namo ang tanan, pero...” ni Dr. Rocamora nga mitan-aw kang Bobby. Mihilak si Bobby human masayri nga apil nga mitaliwan ang gisabak sa iyang asawa.
Samtang nagbangutan nakadawat og tawag si Bobby gikan kang Kathlyn. “Ari sa balay kay sakit kaayo akong tiyan. Manganak na seguro ko!”
Naglibog si Bobby kon unsay angay niyang buhaton. Nabalaka siya sa kahimtang ni Kathlyn. Tungod kay dili maayong mobiya sa haya sa iyang asawa, napugos siya pagtug-an sa kamatuoran kang Kathlyn. Nakigbulag si Kathlyn kaniya human masayri niini ang tanan. Sukad nanganak si Kathlyn naputol ang ilang komunikasyon ni Bobby.
Human sa hubkas sa iyang asawa miduaw si Bobby sa pinuy-anan ni Kathlyn. Nagpakiluoy siya ug nangayog pasaylo. “Serado na akong kasingkasing alang nimo. Lakaw na kay nihupas na ang gugma ko nimo!” Gidaygan ni Kathlyn si Bobby.
Mitulo ang mga luha ni Bobby nga migawas sa pultahan sa balay ni Kathlyn. Nawad-an na siyag paglaom nga magkabalik ang ilang relasyon. Gilingi niya si Kathlyn sa katapusang higayon. Nakita niya kini nga naghilak. Unya midagan kini padulong kaniya.
“Dili nako kaya nga mawala ka pag-usab sa akong kinabuhi, Bob!” ni Kathlyn nga hugot nga migakos kang Bobby.
“Magpakasal ta, Kat, kay nagkinahanglan og amahan ang imong anak!” ni Bobby nga mibalos paggakos kang Kathlyn. (KATAPUSAN)