SA PAGLINGKOD og balik ni Gobernador Gwen Garcia sa Kapitolyo sa iyang ikaupat nga termino, siya nibalik lantaw sa gihimo sa tulo ka kanhi mga kongresista nga nisuway pagbuak sa Sugbo sa upat ka bahin 15 ka tuig na ang nakalabay, sa iyang pakigpulong atol sa iyang inauguration ceremony sa social hall sa Kapitolyo niadtong Dominggo, Hunyo 30.
Samtang, si Bise Gobernador Hilario Davide III pormal nga nanumpa sa iyang katungdanan atubangan ni kanhi Bise Gobernador Agnes Magpale sa samang adlaw sa Casino Español de Cebu, siyudad sa Sugbo.
Ang duha ka tag-as nga mga opisyal sa Kapitolyo magsugod sa unang adlaw sa ilang pagtrabaho sa opisina karong Lunes, Hulyo 1.
Sa iyang inaugural speech, si Garcia nisubli og lakbit sa gipahamtang nga unom ka buwan nga suspensyon sa Malacañang batok niya sa nahabilin nga mga buwan sa iyang pangatungdanan sugod niadtong Disyembre 2012.
Matod niya, wa molampos ang Sugbuak gumikan sa pwersa sa katawhan nga nibarog ug nagkahiusa pakigbatok sa pagbahinbahin sa Sugbo.
“The proponents failed to see then what should have been clear all along: That one should never underestimate the intelligence of the Cebuanos and their capacity to see through all the insincerity, the empty platitudes, and the hypocrisy,” pamulong ni Garcia.
Sa iyang bahin, si Davide namahayag human makapanumpa, nga gipaabot na nga dili malugwayan sa ilang mga trabaho ang contractual nga mga trabahante sa Kapitolyo.
Sumala niini nga naluoy siya mawagtangan og trabaho ang job order, casual ug contract of service nga mga trabahante sa Cebu Provincial Government sa pagsugod sa bag-ong administrasyon, apan matod niya, sa sinugdanan pa lang nasayod na ang maong mga empleyado nga way kaseguradohan ang ilang pagpanarbaho kay gipaagi og kontrata ang ilang trabaho.
“Maluoy ta nga mawala sila pero they know that. It’s the right of the incoming administration to remove them, that’s the prerogative of the incoming administration,” dugang ni Davide, kinsa nanghinaut nga mausab ang maong batasan gumikan kay alang niya dunay mga JO nga maayo motrabaho.
Sa pagpadayon sa iyang pagpamulong, si Garcia niyagyag og mga solusyon ug programa sa pagsulbad sa mga suliran nga giatubang sa lalawigan: inter-local government unit solution sa nagkagrabe nga dagan sa trapiko, mass transport system gikan sa siyudad sa Carcar ngadto sa dakbayan sa Danao, pagpalambo sa binulto nga dugang supply sa tubig ug distribution systems aron pagdala og Level-3 waters systems sa kabarangayan, pagsulbad sa basura pinaagi sa pag-develop og waste-to-energy facilities, ug pagpalambo sa mga pacilidad ug mga serbisyo sa provincial ug district hospitals.
Si Garcia nipasalig nga mas palambuon ang Sugbo ug ibalik isip numero nga lalawigan sa tibuok nasod.
Si Davide nibutyag nga mag-courtesy call siya kang Garcia human sa unang flag raising niini sa Kapitolyo karong buntag, Hulyo 1.
Niadtong Biyernes, Hunyo 28, gisuroy ni Davide ang lainlaing buhatan sa Kapitolyo sa katapusang higayon isip gobernador ug gipasalamatan ang mga empleyado nga nisuporta sa iyang administrasyon sa miaging unom ka tuig. (SCG)