GIHULAGWAY sa direktor sa Police Regional Office (PRO) 7 nga si Police Brigadier Debold Sinas nga malampuson ang kapulisan sa siyudad sa Sugbo ubos sa liderato ni Police Colonel Royina Garma sugod niadtong Hulyo 1, 2018.
Sa datus nga gihatag sa Cebu City Police Office (CCPO) gikan Hulyo 1, 2018 hangtod Hunyo 24, 2019, niabot sa 89 kilos 916.6 gramos nga gituohang shabu ang nasakmit sa kapulisan nga mobalor ang tanan sa P691,479,930 human gihingusgan ang kampanya batok sa ilegal nga drugas.
Nakasikop sila og 2,134 ka drug users ug 2,054 ka drug pushers sa 2,991 ka anti-drug operations atol sa pamunoan ni Garma.
Siyam ang napatay sa police operation diin unom niini drug pusher ug 3 ang user nga giingong nisukol sa mga operatiba.
Ang labing dako nga nasakmit sa kapulisan niadtong Marso 4, 2019 sa Barangay Inayawan diin nakasakmit sila og 18 kilos sa gituohang shabu nga mokantidad sa P122,400.
Ilang nasikop ang 31 anyos nga si Elymar Ancajas lumad nga taga Barangay Jugan lungsod sa Consolacion, probinsya sa Sugbo.
Matod ni Garma nga sa iyang paglingkod isip pangulo sa kapulisan sa siyudad sa Sugbo problema na kaayo ang drugas.
Iyang gitug-an nga dili mahimong piyongon ang iyang mga mata sa maong matang sa problema ug kinahanglan na sila molihok aron puhagon kini.
Nagpasalamat siya sa suporta nga gihatag ang kampo Crame ug ni Sinas bisan sa kagamay ra sa abag sa kagamhanan sa siyudad sa Sugbo.
“Pinakita lang namin through law enforcement that something is wrong already dito sa city and we do not want na maging mag lala yun, so nakita mo with the support ng national headquarters specially our regional director si Sir Sinas despite na hindi masyado sa LGU part ginawa pa rin trabaho namin,”matod ni Garma.
Taliwala sa kalampusan nga nakuha ang kapulisan sa siyudad sa Sugbo, daghan usab sa iyang mga personnel ang napasakaan og kaso tungod sa ilang trabaho.
Gihulagway hinuon niya nga ang volume sa drugas nga nakuha sa kapulisan dili kini alang sa siyudad sa Sugbo sanglit gihimo lang hagbunganan ang dakbayan.
“Alam mo hindi naman yan drugs intended for Cebu City lang its also intended ng mga towns like Talisay and nearby cities it so happened lang na nasagip natin sa Cebu City nadadaanan,” dugang niya.
Nakadayeg pag-ayo si Police Brigadier General Debold Sinas sa performance ni Garma ilabi na sa kampanya batok kriminalidad ug drugas.
Ang accomplishment nga nakuha sa Police Regional Office 7 60 percent niini nakuha sa kapulisan sa siyudad sa Sugbo.
"For the whole of Cebu with our collaborative efforts sa 100 percent na recovery 60 percent ng recovery is Cebu City alone, siya ang pinakadakong performance,” matod ni Sinas.
Iyang gigradohan ang kontrobersyal nga babaye nga Cebu City Director og 'perfect score.'
Atol sa oathtaking ceremony sa Plaza Sugbo, nahimong sama sa celebrity si Garma tungod sa kadaghan sa magpahulagway kaniya.
Si Garma mobiya na karong adlawa, Hulyo 1, sa dakbayan paingon sa kaulohan aron atimanon ang lain niining trabaho isip general manager sa Philippine Charity Sweepstakes Office (PCSO).
Masaligon siya sa mohulip kaniya nga si Police Gemma Vinluan nga mapadayon ang iyang nasugdan nga programa ug pagpadayon sa paggukod sa mga durugista. (B)