LIMASAWA, Southern Leyte - Way naangkon nga dakong kadaot ang lungsod human sa kusog nga linog, Dominggo sa kadlawon, Hunyo 30, 2019.
Matod ni Vice Governor Coco Yap ilang gipasusi ang lugar kon unsay sitwasyon.
Matod ni Yap, way mga major damages ang lugar ug way nangaangol o nakalas.
Base sa report sa Philippine Volcanology and Seismology (Phivolcs), usa ka magnitude 5 nga linog ang miigo sa Limasawa.
Nabatyagan ang Intensity 3 sa Cebu City, Mambajao, Camiguin ug Intensity 2 sa Palo Leyte.
Naakabatyag usab og pag-uyog sa yuta ang mga silingang lungsod sa Limasawa.
Wa usab naitalang kadaot sa ubang lugar nga nakasinati og pagtay-og sa yuta.
Sa miaging June 20, 2019 gipahigayon ang 2nd quarter Earthquake Drill sa Pilipinas apan ang awtoridad di makasulti kon nagamit ba kini atol sa linog sa Limasawa.
Tungod kay atol sa linog hinanok na ang pagkatulog sa mga residente.
Sa Sugbo, natugaw ang pagkatulog sa pipila ka mga lumolupyo nga nakabantay sa pagtay-og.
Ang Pilipinas usa sa mga nasod sa Asia Pacific nga nahimutang sa Ring of Fire.
Kini nagtadlas gikan sa New Zealand ngadto na sa Japan.
Ang Ring of Fire maoy mga dapit sa Pacific diin naa sagad ang mga bulkan ug nahitabo ang mga linog.
Ning uwahing mga buwan, nabantayan ang paglihok sa mga dapit nga naigo sa Ring of Fire. (JKDP)