DILI matugkad sa bag-ong kinasal nga sila si Eugene ug Gladys Mancao ang kalipay nga ilang gibate gawas nga gihiusa sila sa bugkos sa kaminyuon, gi-uwan sila og grasya nga wa nila damha nga moabot sa ilang kinabuhi.
Kinsay magtuo nga ang usa ka yano nga trabahante sa economic zone sa dakbayan sa Lapu-Lapu si Eugene makapakasal ngadto sa iyang kapuyo nga si Gladys, usa ka housewife nga dul-an sa P1 milyon ang balor, apan bisag piso wa silay gigasto.
Facebook maoy yawe
Saysay ni Eugene, 30, iyang nalili-an si Gladys nga nagtan-aw tan-aw sa mga Facebook newsfeed gamit ang ilang cellphone ug nasugatan ang FB page nga nagtanyag og libre nga wedding package sa mapili-an nga winner sa gugmang talagsaon. Wa kini hatagi og gibut-aton ni Gladys dungan sa pag-ingon: “Sure ko dili gyud mi makadaog ana.”
Padayon sa iyang pag-scroll sa maong social media site ang 24 anyos nga inahan samtang nagbantay sa iyang kinamanghurang anak nila ni Eugene diha sa ilang balay sa Barangay Talamban, Cebu City.
Wa mahimutang si Eugene sa maong kahigayonan hinungdan nga bisan nga limitado ang iyang kahibawo sa pinulongang Ingles nipadala siya og suwat nga nagsaysay sa iyang ka-ikag nga moapil aron nga kahatagan og katumanan ang damgo sa iyang minahal.
Nag-uwan sa mga letter sender
Taliwala sa kadaghang mga nipadala og suwat dili lang sa lalawigan sa Sugbo apan gikan usab sa nagkadaiyang dapit sa nasud og abroad, nitumaw nga lahi sa uban ang kaagi ni Eugene.
Gawas sa kalisod sa ilang kahimtang, gikilig ang mga organizer sa iyang sugilanon sa ti-unay niyang gugma ngadto ni Gladys kinsa aduna nay duha ka mga anak sa una niining relasyon.
Wa panumbalinga ni Eugene ang kantiyaw sa iyang mga higala nga mipursigi kaniadto sa pagpanguyab ni Gladys bisan nga gihinganlan og “instant father”.
Pilay sugilanon nagka-uyab, nagpuyo ug nakabaton sila og anak apan wa sila makasal gumikan kawad-on.
Luha sa kalipay
Sa dihang gipahibawo sa “I Do, We Do Your Wedding” organizer nga ang Mancao couple maoy midaog sa grand prize sa dihang personal nga gi-adto sa ilang balay, igo nalang sa nagpamahid sa iyang luha si Eugene samtang nakurat si Gladys kay wa siya magtuo nga mi-apil ang iyang kapuyo sa maong pa-contest.
Moabot sa P935,000 ang wedding package nga nadag-an sa mga Mancao, gikan sa ulo paingon sa kiting nga ilang gisul-ob atol sa wedding day pulos libre.
Lakip na ang pag-andam sa ilang dokomento ngadto sa pagtambong og pre-cana seminar ug ubang preparasyon, way bayad.
Dreams do come true
Nagsinukliay sa “I Do” sila si Eugene ug Gladys sa Sacred Heart Parish, Cebu City niadtong Hunyo 20, samtang ang reception gipahigayon sa Chateau By The Sea, Barangay Punta Engaño, Lapu-Lapu City ingon sa ang venue nahisama sa usa ka fairy tale scene nga makita sa pelikula.
Gipahan-ay sa maong organizer gikan sa dinner buffet, 6-tiered wedding cake, perfume giveaways, photo booth, flowers ug uban pa.
Saad ni Eugene ngadto sa iyang asawa: “Promise nako nimo nga pangga-on tika og maayo.”
“Mahal tika... forever,” tubag ni Gladys ngadto sa iyang bana.