UPAT ka mga bokal ingon man si Bise Gobernador Hilario Davide III wa makakuha og chairmanship sa bisan unsang komitiba sa Hunta Probinsiyal.
Apan ang kaalyado ni Davide sa Liberal Party nga si Bokal Horacio Franco nahimong assistant majority floor leader bisan og di siya sakop o kaalyado sa majority nga One Cebu Party.
Ang 15th Sangguniang Panlalawigan nakapahigayon na sa ilang labing una nga sesyon, diin nipadangat sa iyang inaugural speech si Davide ug nihatag usab sa iyang mensahe si Gobernador Gwendolyn Garcia.
Atol sa inaugural session sa 15th SP, gi-adopt ug gi-aprubahan ang Internal Rules and Procedure (IRP) nga maoy tamdan sa mga sakop niini ug gi-aprubahan usab nila ang chairmanship ug membership sa 28 ka mga komitiba.
Si Davide ug ang naila niya nga mga kaalyado nga silang Bokal Jose Mari Salvador, Jerome Librando, Miguel Magpale ug ex-officio member Irving Gamallo wa makakuha og chairmanship sa mga komitiba sa Provincial Board.
Nilang lima, nakakuha hinuon sa posisyon pagka-vice chairman si Salvador sa Committee on Public Services ug si Magpale sa Committee on Information and Communications Technology.
Si Bokal Librando nga maoy majority floor leader sa 14th SP, wa hinuon igsapayan nga wa siyay chairmanship karon.
“Di man sad namo babag, bisag wa’y committee (gihuptan), we can still work for our constituents sa among distrito,” niingon si Librando.
Ingon niini sab ang panahom ni Salvador ug ni Davide, nga maoy presiding officer sa PB.
Si kanhi Bise Gobernador Agnes Magpale, kanhi presiding officer, may gihuptan nga chairmanship atol sa 14th SP, nga mao ang Committee on Tourism ug Committee on Women and Children.
Silang Davide ug Librando pareho hinuong niingon nga nasabutan na ang committee chairmanship sa pipila ka mga board members apan wala sila’y labot sa “sabot-sabot” bahin niini.
Sukwahi sa lima nga wala makahupot og committee chairmanship, ang kaalyado nila, Franco, mao na ang assistant majority floor leader bisan kon dili siya kaalyado o sakop sa majority party, One Cebu.
Matod ni Franco nga wla siya nibalitok og partido apan nagpasalamat siya nga nahatagan siya og posisyon sa PB.
Gamiton niya kini alang sa dugang pagpangalagad.
“Parties, para nako, dili kaayo relevant karon nga panahon ba. Maayo ra na elections. In the near future, I don’t see nga mobalhin ko.”
Chairman
Sa 18 nga naglangkub sa Hunta Probinsiyal, lakip na sa presiding officer, ang bag-ong napili nga bokal nga si John Ismael Borgonia sa 3rd district nakaangkon sa labing daghang nga chairmanship ug vice chairmanship sa mga komitiba.
Si Borgonia, chairman sa committees on complaints and investigation, provincial and municipal properties ug environmental conservation.
Siya usab ang vice chairman sa committees on barangay affairs, laws and reviews, basic education ug ethics.
Nagpasalamat si Borgonia sa pagsalig nga gihatag kaniya ni Garcia, nga bisan og bag-o siya nga board member, gisaligan siya paghupot sa mga major committees.
Giangkon ni Borgonia nga sila nga mga sakop sa One Cebu ug ang mga kaalyado niini mao lang ang orihinal nga nagsabot-sabot bahin sa committee chairmanship.
Nahatagan hinuon og taas nga posisyon si Franco kay matod ni Borgonia, sayo kini nga nipadayag sa iyang suporta kang Garcia, bisan og dili nila kini kaalyado.
“Kani siya (gisabutan) as a party, sa majority nga naa originally ni-run with Governor Gwen (Garcia) under One Cebu then later on, ni-manifest na ni silang uban nga mokuyog sila ug mouban na sila . Pero wala ta kahibalo in the coming months kon naa bay kausaban (sa chairmanship),” padayag ni Borgonia.
Dugang niya, realidad sa politika ug diha sa PB nga duna gyuy “oposisyon”, ug di sila mahatagan ug komitiba.
Atol sa ilang caucus natuki ang mahitungod sa minority sa PB apan way nibarug nga lider niini. Busa matod niya walay minoriya diha sa Hunta Probinsiyal ug maghiusa sila tanan alang sa pagpangalagad.
Sa wa pa aprubahi ang house rules ug committee chairmanship and membership, nipadangat sa iyang inaugural speech si Davide.
Iyang giladlad ang iyang mga kalampusan dihang nahimo siyang gobernador gikan 2013 hangtud Hunyo 30, 2019. (AZLG)