USA ka pulis nagpositibo sa kinalit nga drug test sa Police Regional Office 7 sa mga pulis sa probinsya sa Negros Oriental niadtong miaging semana.
Gitug-an ni Police Brigadier General Debold Sinas nga ang nagpositibo sa paggamit og shabu mao si Police Staff Sergeant Ruel Sinag, sakop sa Siaton Police Station sa Negros Oriental.
Gipaubos dayon sa confirmatory test sa PNP Crime Laboratory ug nasuta nga positibo gihapon kini sa pag gamit sa shabu.
Tungod sa resulta, gipaimbargohan na dayon siya sa iyang service firearm ug gipalbalhin sa Regional Personnel Holding Admin Unit 7.
Mag-atubang si Sinag og kasong grave misconduct nga mahimong ang hukom taktakon siya sa serbisyo human sa pre charge investigation ug summary hearing procedure.
Gitahasan ni Sinas ang Regional Internal Affairs Service (RIAS) ang modungog sa kaso.
Iyang gimandoan ang RIAS nga hatagan kinig pagtagad sa labing dali nga panahon.
Karong tuiga miabot na sa 5,048 na ka PNP personnel sa PRO 7 ang napaubos na sa kinalit nga drug test isip kabahin sa ilang internal cleansing. (AYB)