NAGDASOK ang 87 ka mga tinun-an sa usa ka classroom sa Tipolo National High School sa ilang pagpadayon sa klase sa Lunes, Hulyo 1, 2019.
Gikanselar ang klase sa tunghaan sukad niadtong Huwebes human maapil og kasunog ang 10 ka classrooms, duha niini naugdaw ug walo ang partially damaged.
Si Miriam Morata, prinsipal sa tunghaan, niingon nga ang partially damaged building di pa mahimong gamiton tungod kay wa pay pagtugot gikan sa Office of the Building Officials (OBO).
“Amoang gi-fuse (ang section). Instead of lima ka section, gitulo na lang namo ka section. Tapos gi cut-off to 40 mins. per subject instead of 1 hour kay aron di maabtan og gabii. Mag-start ang klase og 6:30 sa buntag. Mahuman 4:30 sa hapon ug duha na lang ka shift, morning and afternoon”, saysay pa ni Morata.
Si Morata usab nagkanayon nga sa liboan ka mga estudyante nga nangeskwela, 700-800 niini ang apektado sa sunog.
Dugang usab niya nga ang mga bata nagkinahanglan og school supplies.
Ang ilang tunghaan nagkinahanglan usab og construction materials kay delikado kini nga masudlan sa mga taga gawas. Giproseso usab ni Morata ang mga kinahanglanon aron sa pagbalik sa kuryente sa eskwelahan.
“Dili man lalim magklase ang mga bata nga ngitngit, alimuot ug dili friendly environment sa mga bata pero unsaon man nga kinahanglan man gyud mi magklase,” suti ni Morata sa Superbalita Cebu. (Leonor Jorge ug Jessa Mae Genobisa - CNU Comm Interns)