Ang dali nga pagtubag sa bisan unsa nga problema nga ipadangat sa mga Talisaynon pinaagi sa Aksyon Agad Administrasyon ang gipasalig nga programa sa bag-ong mayor sa Talisay City, Gerald Anthony “Samsam” Gullas.
Iya usab nga giawhag ang mga kawani sa Talisay City Hall ug kaubanang mga opisyal hangtod na sa kabarangayan nga mohimo og kinasingkasing ug tinuoray nga pagpanerbisyo.
Human sa gihimo nga oath taking nila ni Bise Mayor Alan Bucao ug mga nidaug nga konsehal, Lunes, Hulyo 1, gipahigayon usab ang pormal nga pag-turn over sa kagamhanan gikan sa iyang apohan nga si first district Representative Eduardo Gullas, atubangan sa City hall.
Sa iyang mensahe, nipasidaan si Eduardo kang Samsam, mga kaubang opisyal ug mga kawani sa City Hall, sa pag-pagpangga ug higugmaon ang Siyudad sa Talisay alang sa dugang kalambuan.
Usa na niini nga paagi sa bag-ong mayor mao ang paghimo og hotline sa City hall nga mahimong matawgan, sa mga Talisaynon, gikan sa mga problema sa baha, trapiko o bisan unsa na.
Team
Ang Aksyon Agad, gipasabot ni Samsam, usa ka team ang iyang tukuron nga ubos sa iyang pamunuan.
Aduna kini 20 ka mga tawo, nga anaa nay plumber, engineer ug uban pa alang sa mas dali nga pag-aksyon sa mga problema sa syudad, 24 oras.
Mopahimo siya og hotline nga maoy daling motubag ug mopadangat sa mga problema.
“As far as Aksyon Agad is concerned, I formed a 20-man task force, under the mayor’s office, which is composed of electricians, plumber, panday, desilting team and others. Way laing trabahon, kon naay complaints of flooding, way suga, any complaints, basically in our aksyon agad hotline, kini atong 20-man team maoy mouna didto. And the system will be, they can make recommendations to the mayor and make a recommendation sa engineering or any department involved,” saysay ni Samsam sa mga tigbalita.
Panguluhan sa daan nang sinaligan sa kongresist nga si Digoy Villanueva ang team, apan ubos kini sa direct supervision sa mayor.
Ang team, dugang sa mayor, mo-desilt sa mga kanal kada semana, mangulo sa binuwan nga paglimpyo sa kasapaan ug quarterly nga coastal clean-up.
Lunes sa buntag, human sa flag raising ceremony, nituyo sa iyang buhatan ang mga department head, mga kawani ug uban pa nga nangalagad sa Talisay City hall, alang sa gihimo nga courtesy call.
Gitug-an ni Gullas nga ang pagtubag sa problema sa trapiko ug baha sa siyudad ang priority ning unang 100 ka adlaw sa pamunuan.
Tumulak
Iyang gikuha ang serbisyo sa kanhi pangulo sa City Traffic Office sa syudad sa Sugbo, kanhi focal person sa Provincial Traffic Management ug kanhi Cebu South Bus Terminal head, Joy Tumulak.
Nag-una niya nga mandu ngadto kang Tumulak, nga ipatuman kon unsay anaa sa balaud, sama na sa estrikto nga pagsunod sa pagsul-ob og helmet sa magmotorsiklo.
Lakip sa patun-an kon kanus-a mamahimo nga makalabang o makaagi sa national road ang mga tricycle ug pedicab.
Giawhag ni Samsam si Tumulak nga pakigtagboan ang mga stakeholder pagkuha sa ilang mga sugyot ug rekomendasyon unsaon pagsulbad sa trapiko dunay pagsinabtanay ug dali ang solusyon.
Dugang ni Tumulak nga makig-alayon usab sila sa Land Transportation Office (LTO) alang na unya sa pag-isyu og Temporary Operator’s Permit (TOP), apan sa pagkakaron, matud ni Tumulak, nga mahimo man nga maka-isyu og citation. /