HIMUON nga mas sayo ang sinemana nga flag raising ceremony sa Mandaue City hall, mga kalihukan alang sa Golden Cityhood sa Mandaue, basura, pag-amendar sa plastic ban, ug bonnet o face mask ban.
Apil na ang kahapsay ug kalinaw sa dakbayan, maoy nag-una nga buot matubag sa unang tulo ka buwan ni Mayor Jonas Cortes.
Gihimo ang flag raising ceremony, alas 8 Lunes sa buntag, diin lakip sa nitambong si Cortes, Bise Mayor Glenn Bercede ug mga konsehal, mga kawani sa city hall ug nagkadaiya nga ahensya.
Human sa flag raising ceremony, usa sa gipahibawo ni Cortes nga imbes nga sa naandan nga alas 8 Lunes sa buntag himuon ang flag raising, himuon kini alas 7:45. Kini aron sa alas 8 sa buntag, kasugdan na ang pagpadangat sa serbisyo alang sa Mandauehanon o ni bisan kinsa nga adunay tuyo sa City Hall.
“Usik man gud , usik, pila na ka minutos ang nia diri. Ang uban nagpaabot na sa opisina. Sayang ang tax sa katawhan nga gisweldo nato, nya nia ta dire, nakuhaan ang oras sa pagpanerbisyo,” pagpasabot ni Cortes.
Nag-una niya nga mando ang pagtan-aw sa mga angay atngan sa Mandaue City sa pagsaulog sa Agusto nga maoy ika-50 ka tuig na nga Charter Day sa Siyudad.
Gimanduan usab niya ang kasamtangan nga nangu sa Mandaue City Police Office, Police Col. Julian Entoma, nga palambuon pa ang gipatuman nga kalihukan, ilabi na sa police visibility, pagpahimutang og police outpost sa mga vital o major intersection, sama sa barangay Subangdaku ug Maguikay.
Nipadayag usab siya og tabang sa kapulisan ug kabomberuhan pinaagi sa pagpalit og dugang sakyanan alang sa MCPO ug fire truck.
Samtang ipatan-aw pagbalik ni Cortes sa konseho ang ordinansa nga nag-ban sa paggamit sa bonnet ug face mask sa mga motorista ug angkas.
“Kana akong hangyuon ang Konseho nga ato untang usbon ning ordinansa. Nindot man na kon limpyo ang atong mga dalan pero dili lang siguro nato i-compromise ang health sa mga riders, ilabi na kadtong mga kabus nga dili maka-afford og Grab, taxi or dili kapalit og auto. Og masakit na, dili na katrabaho. So, wala nay ikapakaon, walay ikapa-eskwela. Mao ni angay nga tan-awon sa konseho,” dugang ni Cortes. (FMD)