KINSAY mamahimong mayoriya sa Cebu City Council, ang administrasyon ubos ni Mayor Edgardo Labella o ang opposition nga Bando Osmeña Pundok Kauswagan?
Mahibaw-an ang tubag sa pangutana atol sa ipahigayon nga inaugural session sa konseho karong hapon atol sa pagbinahinay sa kapin 20 ka komitiba.
Atol sa oath taking niadtong Dominggo, si Mayor Edgardo Labella nipasumbingay nga mayoriya na ang Barug PDP Laban human nisaka sa stage si Konsehal Dave Tumulak ug Jerry Guardo, pulos kaalyado sa BOPK.
Si Guardo, kinsa giproklamar na kagahapon sa Comelec En Banc nga konsehal, motambong sa session karong adlawa human sa iyang oath taking karong buntag.
Ang Barug PDP Laban adunay pito ka mga konsehal nga napili sa miaging eleksyon.
Human madugang sila si Guardo ug Tumulak, mahimo na silang siyam. Ang Konseho dunay 18 ka mga sakop, duha ni ex-officio members nga puro mga kaalyado sa BOPK.
Karon nga naa na sila si Tumulak ug Guardo nagsuporra sa Barug, tag siyam na ang duha ka mga partido.
Hayan matangtang
Si Konsehal Sisinio Andales nameligro nga matangtang sa konseho sama sa gidangatan ni kanhi Konsehal Alvin Arcilla.
Silang duha gitangtang sa En Banc pinaagi sa pag-cancel sa ilang certificate of candidacy.
Si Arcilla napakyas sa pagkuhag temporary restraining order nga iyang giuban sa iyang appeal sa Supreme Court.
Tungod niini, ang En Banc niluwat og certificate of finality ug writ of execution.
Gipanglantawan nga mahimo usab kini kang Andales.
Kon mahitabo kini, mohulip kaniya si Joel Garganera, kinsa maoy ika-10 sa ranking sa mga konsehal sa milabay nga eleksyon.
Si Vice Mayor Michael Rama wa nibutyag kon unsay posibleng mahitabo karong hapon uban sa pagbutyag nga makaayo para sa mga Sugbuanon ang ilang lakang nga pagabuhaton.
Motambong ugma sa inaugural session sa 15th Sanggunian si Labella, kinsa mamulong usab atubangan sa Konseho. /