NASUGAMAK na sab sa laing kapildihan ang Gilas Pilipinas Youth, ning higayuna batok sa world No. 9 Argentina, 77-72, kagahapon sa Fiba Under-19 World Cup sa Heraklion University Sports Hall sa Greece.
Ang Gilas Youth, nga nasubhan og 85-69 nga kapildihan batok sa host Greece, nakapakita nga makakombati sila og insakto batok sa labing lig-ong teams sa tibuo kalibutan apan malupig lang sila sa lahutay.
Bisan wala ang usa sa ilang labing sinaligan nga si Fil-Nigerian AJ Edu, kinsa naangol (torn ACL) sa sayong bahin sa duwa batok sa Greece, ang Gilas Youth nakapanghudlat gihapon batok sa Argentina.
Wala dayon miisa sa ilang puti nga bandera ang mga Pinoy ug ninggukod kini hangtod nga nakaduol sila pagbalik, 73-69, sa nahabiling 33 ka mga segundos.
Apan pakyas ang Gilas Youth sa pagkompleto sa ilang paggukod hangtod mitingog ang final buzzer.
Gipangulohan ni Dave Ildefonso ang Gilas Youth pinaagi sa iyang 22 puntos ug 10 rebounds samtang nidugang og 17 puntos ang batan-ong higante nga si 7’2” Kai Sotto. (ESL)