WA PA man tuod mahingpit ang kamada sa konseho sa dakbayan sa Sugbo, apan napanglantawan nga aduna na unyay kausaban sa Cebu City Sports Commission (CCSC).
Apan kini mag-agad lang usab kon maporma na gyud ang mga komitiba sa konseho nga langkuban na unya sa mga bag-o ug nasubli-ang nga mga konsehal sa Cebu City.
Hinuon duna nay mga pangalan nga mitumaw nga maoy modumala pero dili pa nato mabutyag ning mga panahona kay matod pa padayon kining gitimbangtimbang kon kinsa gyud ang angayan ug haom nga padalhon.
Kon hisgutan na gani ang paugnat sa kusog, ang ngalan sa bag-ong napili ug no. 1 councilor sa south district nga si Dondon Hontiveros gyud dayon ang mosantop sa hunahuna sa kadaghanan nga maoy modala sa sports sa dakbayan.
Si Hontiveros, nailang Cebuano Hotshots sa PBA, gikonsiderar nga usa ka sports icon sa nasod ug ang iyang hugot nga kampanya nga nasentro sa pagpalambo sa natad sa paugnat sa kusog sa dakbayan maoy naghatod kaniya sa konseho.
Kon buligan nga siya gyud ang makadala sa committee on sports sa konseho, damgo ni Dondon nga ibalik kadtong mga sporting events kaniadto nga taodtaod nga nataligam-an ubos sa nanglabayng administrasyon.
Kini sama sa inter-barangay basketball tournament diin kon wa ko masayop, nakaduwa usab siya sa wala pa mahimong varsity player, nga maoy nagyawi kaniya ngadto sa pagka professional player.
Tinguha usab niya nga makapahigayon og mga commercial leagues nga maoy sagad masaksihan sa mga Sugboanon kaniadto.
Gawas sa basketball, ipadayon usab niya ang mga grassroots program sa nagkalainlaing events.
So, sa gikaingon ko na sa unahan, nga magdepende ra lagi kini kon mahuman na ang kamada sa konseho.
Kon unsa ang nasinati sa Cebu City, mao usab kini ang nahitabo karon sa Cebu Province.
Dakong kausaban sa mga personnel ug mga bag-ong nawong na unya ang modumala sa Cebu Provincial Sports Commission (CPSC) nga kanhi gidumala ni Atty. Ramil Abing.
Dunay hugonhugon nga mahaw-as ang tanang mga staff ug personnel sa maong departamento.
Sa pagkakaron, wa pa tay natimahuan kon kinsa ang padad-on sa bag-ong napiling gobernador nga si Cebu Governor Gwen sa CPSC.
Pero saludo kita sa liderato ning ni Garcia nga pruybahan na sa niagi niyang pagdumaloa sa probinsya. (jun.migallen22@gmail.com)