BISAN sa nasugamak na sab ang San Miguel Beermen sa laing kapildihan nga nagpatidlom sa ilang poruhan sa playoffs, malaumon lang gihapon si Arwind Santos nga makabangon ra sila sa kasamtangan nilang kagidlay nga sitwasyon sa Philippine Basketball Association (PBA) Commissioner’s Cup.
Ang Beermen naunlod sa 2-5 nga rekord human sila gipakaging sa Columbian Dyip pinaagi sa overtime, 134-132, niadtong Dominggo.
Sa kasamtangan, nakigbahin ang multi-titled Beermen sa NLEX Road Warriors sa ika-10 nga puwesto. Ning puntoha, wala na’y poruhan nga makasulod ang Beermen sa top 2 nga nagtangag og twice-to-beat nga bintaha sa playoffs.
“Hindi kami masaya sa 2-5. Kahit mapunta lang kami sa top eight. Eighth position na lang,” matod ni Santos sa interbyu sa Spin.ph. “Minsan, na-experience ko na mangarap ng mataas. Pangarapin naman namin ‘yung top eight tapos lalabanan namin ‘yung number one, twice-to-beat tapos tatalunin namin. Parang ganun na lang siguro.”
Masaligon si Santos nga ang pagsulod sa playoff mao ra’y nakatutok sa ilang atensyon ning panahuna ug kon mahitabo kini, hayan puwede na silang mangambisyon nga mapun-an ang ilang panudlanan sa titulo. (ESL)