Mongaya: Padayon human sa pili-ay

NAG-abot sa Syudad sa Tagbilaran ug dinhi sa Syudad sa Sugbo ang mga political officers nga ningtabang sa lain-laing mga politiko sa lain-laing dapit sa Pilipinas ubos sa liderato ni Bise Mayor sa Tuburan Aljun Diamante.

Gikinahanglan kining ingon niini nga hugpong, matod pa ni Mayor Diamante, sa tumong nga mapalambo ang kalidad sa pamulitika sa nasud labi na karong nahuman na ang pili-ay.

Ako lang klaruhon nga di man lang gud politiko kini si Mayor Diamante sa usa ka lungsod, maingon nato nga usa siya ka political officer sab kini diha sa iyang paggiya sa liga sa mga mayor dinhi sa Visayas ug sa pagtukod sa National Movement for Federalism (Namfed).

Ug kon maghisgot tag kahanas sa political battles, lalim bay nakadaog ang iyang igsuon sa pagka mayor batok ni Daphne Lagon bisan ang partylist nga Ako Bisaya sa bana niini nga si Sonny Lagon nakadaog sa ilang lungsod.

Sa pagkakaron, nipadayag siya og suporta alang kang Gob. Gwen Garcia. Gani, iyang giduso si Mayor Christine Frasco sa Liloan isip presidente sa LMP sa lalawigan.

Kalamboan

Gipadayag ni Gob. Garcia ang iyang plano nga himuong balik nga numero uno ang Sugbo. Tipik niini mao ang mga plano aron sa pagsulbad sa problema sa tubig, trapik ug basura di lang sa lalawigan, labi na gyud sa Metro Cebu.

Makadasig kining maong pamahayag sa gobernadora. Nakaila na man kita ni Gob. Gwen, duna kini siyay political will nga moduso sa iyang mga plano.

Ug atong malantaw nga mas madali kini labi na nga naa kaniya ang suporta sa administrasyon ni Presidente Rodrigo Roa Duterte ug Presidential Assistant Michael Dino.

Sa miaging bulan, nakita nato nga nagkasabot kini si Gob. Gwen ug PA Dino sa bag-ong mayor sa Syudad sa Sugbo sa pag-coordinate kabahin sa mga proyekto alang sa kalamboan sa Sugbo.

First District

Makadasig kay duna na say lain-laing mga inisyatiba ang mga mayor labi na dinhi sa Metro Cebu. Pananglitan, sa hisgutanan nga waste-to-energy, kaniadto pang 2010 nagsugod ang proyektong solid waste disposal diha sa Pangdan, Syudad sa Naga.

Nakahibawo na man kita nga kining pasilidad diha sa Naga nag-una sa Sugbo kabahjin sa waste-to-energy. Gani, sukad sa pagsugod niini, nakahibawo na kita nga nag-supply ang Naga og 10 metric tons kada adlaw og maingon nato nga alternative fuel sa coal-fired plant sa Cemex.

Sa akong nasabtan, kulang na lang ang dugang investment diha sa Naga ug gamayng pagduso sa KSPC nga mogamit sab og maong alternative fuel nga gikan sa basura.

Atong gilantaw sab ang pagporma na unya sa dakong reclamation project sa Syudad sa Naga nga angay lang masumpay sa proyekto sa Minglanilla ug Cebu Landmaster Inc. dayon sa plano sab sa bag-ong mayor sa Talisay nga si Samsam Gullas. (@anolcebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph