KAULAW ug pagdaot sa iyang dungog ang gihambin karon sa usa ka 23 anyos nga dalaga human kini gitouk, gisinggit-singgitan sa grupo sa mga batan-on diha sa usa ka establismento o balay kalingawan niadtong Hunyo 23, adlawng Dominggo sa Corrales Extension sa siyudad sa Cagayan de Oro.
Si Evie (tinuod nga identipikasyon gitago) nagpatabang sa SunStar Superbalita human bout niyang mahatagan og hustisya ang pagpanghasi ug pagpakaulaw kaniya sa grupo sa mga batan-on.
Saysay niini nga lumad siya nga Kagayanon ug tulo na ka tuig sa Cebu City isip usa ka magtutudlo. Nagbakasyon lamang niadtong tungora dinhi sa siyudad ug nagkitaay sa iyang mga barkada niadtong tungora sa usa ka balay kalingawan mga alas 1:00 sa kadlawon.
Samtang naghulat sila og mabakante ang lugar sa second floor sa usa ka establismento, adunay grupo sa mga batan-on nga nagsinggit singgit kaniya og kabit. Wala niya kini gitagad sa pagtoung dili siya mao ang gipasabot niini.
Apan wala niya damha nga kining mga batan-on nga panglantaw niya lango na sa ilimnong makahubog ang kalit misaka sa second floor ug usa ka babaye ang kalit mibira sa iyang buhok, gituok ang iyang liog ug nagsinggit nga "Mao ning maestra nga kabit."
Kaulaw ang iyang gibati sa panghitabo ug wala na misukol kanila.
Nagpatabang sa Police Station 5 sa Macabalan si Evie ug dinhi gipapangayo kaniya ang kopya sa closed circuit television camera sa maong patigayon. Apan tungod kay walay identipikasyon sa mga suspek, hinungdan nga pending ang kaso karon panahona.
"Gusto ko mahatagan og justice kay kadtong ilang pagsinggit-singgit sa akoa nga kabit wala gyod toy kamatouran, grabe ilang pagpakaulaw sa akoa," matud ni Evie sa interbyu sa Superbalita.
Dugang niini nga pamilyar lang niya kadtong usa ka babaye nga miatake kaniya tungod kay niaging tuig mga bulan sa Enero 2019 ang ex boyfriend niini nanguyab kaniya pinaagi sa chat.
"Layo man mi naa siya CdeO ako sa Cebu, ga chat lang mi ug giconsider nako siya as a friend pero wala nako siya gisugot," matud ni Evie.
Dugang saysay niini nga niadto lang Marso 2019, nagpadala og mensahe kining babaye kaniya ug miingon nga giilad lang siya sa maong lalaki ug gipasakay sakayan.
"Dili kaayo ko apektado kay dili man mi uyab ug usa pod friend rami diha sa chat," matud ni Evie.
Apan gikakurat niya nga mao kini ang atake kaniya diha sa usa ka patigayon.
Mas nasakit siya pag-ayo tungod kay naalaan pa gyod siya og kabit sa laing kostumer sa maong patigayon nga lakip sa nagsinggit singgit kaniya.
"Duha ka persona nag-accused nako sa public nga kabit ko," dugang niini.
Ang bout mahitabo ni Evie nga unta mahatagan kini og aksyon deretso sa kapolisan ug nangayo og tabang sa publiko nga maila kini nga mga personalidad aron iyang mapasakaan og tukmang kasong pagpakaulaw kaniya sa walay igong basihan.