NITAPON na si Kevin Durant sa Brooklyn Nets, ug gibiyaan ang Golden State Warriors human ang tulo ka seasons.
Iyang hukom gipahibawo kagahapon (Lunes, oras sa Pilipinas) sa pagsugod sa NBA free agency period sa Instagram page for The Boardroom, usa ka online series nga nagtan-aw sa sports business nga giprodyus ni Durant ug business partner Rich Kleiman.
Si Durant nidaug og mga titulo uban sa Golden State niadtong 2017 ug 2018 unya naangol sa tibuok postseason karong tuiga kon diin ang tim napildi sa NBA Finals sa unom ka mga dula ngadto sa Toronto Raptors.
Ang angol sa tuong Achilles tendon mopahulay kaniya sa tibuok sunod season, ug sa iyang pagbalik sa Brooklyn Nets na siya moduwa.
Unang gitaho sa ESPN ang desisyon ni Durant, kon diin nagkanayon nga niuyon siya sa “four-year deal” kantidad og $164 million. Si Durant makalugway unta og lima ka tuig ug makakuha og mga $221 milyon kon nagpabilin sa Warriors.
Si Durant, 10-time All-Star kinsa bag-o lang nikompleto sa iyang 12th NBA season, nanguna sa tanang postseason scorers sa 34.2 puntos matag dula sa dihang naangol ang tuo niyang batiis niadtong Mayo 8 sa Game 5 sa Western Conference semifinals batok sa Rockets. Duna siyay pito ka 30-point performances atol sa bag-ohay lang nga playoffs.
Di hinuon klaro kon unsaon niya pagdula kon makabalik, apan ang Nets andam nga mohimo og higayon sa tim nga mosanag.
Ang Brooklyn nahuman og 42-40 karong season ug napildi sa unang hugna sa playoffs, apan nakakuha og dakong daug kagahapon sa dihang gipukan ang Warriors, New York Knicks ug Los Angeles Clippers sa pag-angkon sa katungod kang Durant.
Karon nga season napuno sa daghang tabi alang sa kaugmaon ni Durant, gani nahasol na siya, bisan tuod og nakatutok na sa Knicks kon makahukom na siyang mobiya.
Apan ang Nets maoy dunay makadani nga opsiyon uban sa batan-ong talento nga motabang kanila nga mahimong lig-on sunod season samtang si Durant di pa maka-recover.
Samtang ang Warriors kinahanglan nga mopadayon nga wala na si Durant, kinsa dunay tulo ka duwa nga dunay 45 puntos o kapin sa postseason una naangol.
Hinuon duna pa silay Stephen Curry, Draymond Green ug gilauman nga mobalik og lagda si Klay Thompson, apan di siya makaduwa sa tibuok sunod season human nakasinati og angol sa ACL atol sa NBA Finals.
Ang dakong og kahigawad mao ang Knicks, kinsa nitigum og igong salapi aron nga mopalagda og duha ka maximum salary free agents sa dihang gibaylo si Kristaps Porzingis atol sa season sa paglaum nga makuha nila ang serbisyo ni Durant.