“WHITE elephant” ang tawag sa mga gambalay nga way pulos. Proyekto kini nga gigastohan sa gobyerno gikan sa bulsa sa mga yanong lungsoranon apan nagpabiling way gamit.
Daghan kining mga puti nga elepante sa panahon ni kanhi Pres. Marcos kay abi tingali niya nga di siya mahawa sa puwesto.
Adunay pipila niini dinhi sa Davao City. May dakong gambalay diha sa kanto Quimpo Boulevard atubangan sa Davao Overland Transport Terminal sa Ecoland nga gigamit kaniadto isip buhatan sa Ministry of Human Settlement ni kanhi First Lady Imelda Marcos nga hapit na naguba.
Kamo nga mibasa niining kulom makasulti usab kung unsa pang gambalay sa inyong lugar nga gipanag-iyahan sa gobyerno nga walay gamit. Apan ang pinakadako nga puting elepante nga nagbuntaog diha sa Diversion Road sa Barangay Langub mao ang Artica Sports Dome.
Gitukod kini sa tuig 2001 sulod sa pangatungdanan ni Mayor Benjamin de Guzman isip hulip sa pagkahuman sa ikatulong termino ni Mayor Rody Duterte nga nahimong kongresista sa unang distrito sa Davao.
Gidonar kini sa usa ka adunahang pamilya nga may anak nga gihinganlan og “Artica” nga mao usab ang gingalan niini.
Kung wa ko masayop, nangutang ang lokal nga kagamhanan sa World Bank og sobra P250 milyon sa pagtukod sa maong “sports complex” nga pwedeng masudlan og 15,000 ka tawo.
Nasayod kita nga nagkinahanglan ang dakbayan og dako nga lugar dulaanan kay ang Almendras Gym ra intawon ang daugdaugon kung may dakong pasundayag dinhi nga may kapasidad lamang og 5,000 ka tawo.
Gigamit pa kaniadto ang Central Bank sa mga dagkong okasyon sama sa, “conventions”, “trade exhibits” og “beauty pageants” kay way laing kaadtoan.
Dili sab maka-host ang siyudad sa dagkong “sports events” kay kulang ang pasilidad pang isports busa daghan ang nisuporta sa maong proyekto.
Apan unsang hitaboa nga wala man kini madayon? Usa sa mga dakong isyu niini mao ang kakulang sa saktong “environmental study” o pagtuon kabahin sa nahimutangan sa maong gambalay tungod sa pagdalidali kuno sa kasamtangang administrasyon ni Mayor de Guzman.
Hapit 20 na ka tuig nga nilabay og nagpabiling nagbarog ang maong gambalay. Karong bag-o niguwa ang taho sa Philvocs nga 60 ka barangay sa Davao delikado sa linog kay nasulod sila sa gitawag nga “Five Segments of Davao Central Fault System.”
Gilangkuban ang lima sa Tamugan, Lacson, Dacudao, Pangyan-Biao Escuela og New Carmen Fault Line diin nahimutang ang Barangay Langub nga gitukoran sa Artica Sports Dome.
Sa niaging mga semana giduaw ang Mindanao og pipila ka linog nga gikabalaka sa tanan. Ang pangutana kung unsay buhaton sa Artica Sports Dome? Gibalik na ba kini sa tag-iya o magpabiling “White Elephant?” Hello Mayor Sara!