Kanhi welder nakuhaan og P8M shabu

MOKABAT ngadto sa P8.1 million nga balor sa illegal nga drugas nasakmit sa Drug Enforcement Unit nga gipangulohan ni Pol. Lt. Col. Glenn Mayam inabagan sa Consolacion police pinaagi ni Police Major Gerard Ace Pelare ug Mabolo Police station atol sa buy bust operation sa sitio Lahing-lahing, Barangay Mabolo, Siyudad Sugbo, alas 3:15 sa Martes sa kaadlawon.

Ang target sa operation mao si Roland Agujar Cosep, alias “Landoy”, 44, kanhi welder, taga Sitio Lahing-lahing.

Nakuha gikan kaniya ang 48 ka dagkong pakete sa gituohang shabu nga motimbang og 1.2 kilos nga mobalor ang tanan og P8,160,000.

Giila si Cosep nga high value target ug nalakip sa mga target list sa lungsod sa Consolacion ug mga silingang lungsod.

Padayon ang imbestigasyon asa magkuhaan sa iyang supply sa ilegal nga drugas si Cosep ug kinsa usab ang iyang amo.

Matod ni Police Major Gerard Ace Pelare, hepe sa Consolacion police station, ang Drug Enforcement Group 7 maoy nakakuha sa impormasyon labot aning Cosep nga giila nga mao usab ang tig supply sa ilegal nga drugas sa maong lungsod.

Giila nga usa ka dakong drug player ug drug supplier si Cosep diin ang mga dagkong siyudad sa Metro Cebu ug mga silingang lungsod sa probinsya sa Sugbo maoy iyang suplayan sa illegal nga drugas.

“Dako na kaayo siya kay ang area of operations ana kay ang mga major cities ug sa province,” matod ni Pelare.

Wa mahibaw-i ni Pelare kon kinsa ang nag supply kang Cosep og drugas apan giingong gikan kini sa Luzon.

Lahing-lahing

Ang kanhi kapitan ug konsehal na karon sa Mabolo nga si Reynaldo Ompoc, maoy nisaksi sa pagkadakop kang Cosep.

Ang konsehal mao usab ang pangulo sa peace and order sa barangay.

Matod ni Ompoc, si Cosep kanhi welder, minyo, lumad nga taga Sitio Lahing-lahing.

Matod pa sa konsehal nga sa dihang nahinabi niya si Cosep, niingon kini nga ang butang gibilin sa usa ka nagngalang “Mark.”

Sigon usab sa konsehal nga kadaghanan sa surrenderers gikan sa Lahing-lahin.

Wa usab kini maapil sa ilang Oplan Tokhang.

Sa pagsusi sa Superbalita Cebu, si Cosep adunay anak nga dugay nang napriso sa Lapu-Lapu City sa kasong may kalambigitan sa drugas ug pagpangawat.

Saysay usab ni Ompoc nga ang Lahing-lahing dunay mga tawo nga naghimo og ilegal kay daghan og kalutsan.

“Mao ng makaingon ko nga kanang Lahing-lahing sud gawas ang illegal,” matod ni Ompoc.

Follow-up operation

Human sa interogasyon, nitug-an si Cosep nga aduna pa siyay tawo sa lungsod sa Consolacion nga gihimoan dayon sa follow up operation.

Alas 4:30 sa kaadlawon, Hulyo 2, ilang girumbo ang balay ni Rodelio Oporan Bontuyan, alyas Bodi, 48, taga sityo Dita, Barangay Pulangbato, siyudad sa Sugbo.

Si Bontuyan anha sa lungsod sa Consolacion manugal og tari sa manok ug giingong mamaligya usab og illegal nga drugas.

Nakuha gikan kaniya ang 195 gramos nga gituohang shabu nga mobalor ang tanan og P1,326,000.

Sakop sa usa ka dakong sindikato sa illegal nga drugas si Bontuyan nga naglihok sa probinsya sa Sugbo.

Usa ka oras ang nakalabay, laing anti drug operation ang gihimo sa Consolacion police station sa Barangay Tayud diin upat ka tawo ang nangadakpan.

Ang nasikop giila nga si Irene Casipong Sanchez, 34, nagpuyo ra usab sa dapit nga maoy target sa operation.

Naabtan nga nanuyop sila si Roel Sorela Gabayan, 25, taga Mabini, dakbayan sa Sugbo; Charmine Bago Hortelano, 24, taga District 4, Pulpogan, Consolacion; ug Jose Tampus, 27, taga Barangay Pulpogan.

Nakuha gikan kanila ang mga pinakete sa gituohang shabu nga mobalor ang tanan og P3,500 nga naa na sa kustodiya sa kapulisan. (AYB, Leonor Jorge ug Jessa Mae Genobisa-CNU Comm Interns)