DI LANG diay koneksyon ang kuryente, tubig, kisame, tiles mga aparador, toilet bowl ug uban pa ang wa na sa buhatan ni kanhi mayor Tomas Osmeña, wa na usab igkita ang selyo sa mayor.
Nabantayan kini dihang manumpa na unta isip sakop sa Konseho si Konsehal Jerry Guardo Martes sa buntag, Hulyo 2.
Nalangay sulod sa pipila ka minuto ang oathtaking ni Guardo kay nagpangitaay pa sa seal of the mayor.
Apan human sa dul-an 20 minutos nga pinangitaay sa buhatan ni Osmeña sa ikawalong andana sa legislative building, way nadala nga seal ang mga staff ni Labella.
Aron maka-administer siya sa pagpanumpa ni Guardo isip konsehal, gitangtang na lang ang iyang seal of vice mayor sa iyang kanhi buhatan.
Ang pagpanumpa gipahigayon sa buhatan sa bise mayor.
Gigamit kini ni Labella isip iyang temporaryo nga buhatan.
Gipasabot ni Labella nga importante ang seal of the mayor kay kini sa simbolo sa awtoridad.
Matod ni Labella nga ang selyo gidonar hinungdan nga gipanag-iya na kini sa Kagamhanan sa Siyudad sa Sugbo.
Di usab buot si Labella nga mamasangil nga lakip kini nga gikuha sa kampo sa kanhi mayor.
“We were looking for it, but until now we haven’t seen it. I thought, only the (toilet) bowl that was lost. Dili man maayo nga mamasangil. But in the same manner, nawala man sad ang bowl,” sulti ni Labella ngadto sa mga tigbalita.
Iya pang gipasusi pag-ayo sa mga staff kon asa na ang maong seal.
Gitugyan ngadto sa City legal office alang sa posibleng legal nga aksyon.
Gisulayan sa pagkuha sa iyang habig si Osmeña.
Si Osmeña, sa iyang text sa Superbalita Cebu, niingon nga iyang tan-awon kini nga isyu sa iyang paghibalik gikan sa Hong Kong.