LAB-as pa sa atong panumdoman ang pagsira sa Boracay sulod sa 6 ka bulan tungod kay, matod pa ni President Rodrigo Roa Duterte (PRRD), hugaw ug delikado na ang kadagatan sa Boracay.
Gibatikos pa og wala’g tuo si PRRD pero human sa 6 ka bulan, nahilom ang mga tig-batikos tungod kay nahimo man niya ang wala gyod mahimo sa ubang mga Presidente nga nauna pa kaniya.
Limpyo na karon ang Boracay og mibalik ang kalagsik sa turismo sa maong lugar. Labi na kay dunay daghang mga kabag-ohan ang pagpasulod sa mga turista didtong dapita.
Nindot na kaayo ang Boracay karon.
Sa Bohol, usa sa mga ilado nga lugar nga bisitahonon sa mga turista mao ang Panglao Beach.
Matod pa, dili kompleto ang pagbisita sa Bohol kon dili iapil pagbisita ang Panglao Beach.
Nindot ang kadagatan og puti ang balas sa baybayon.
Apan nag-atubang kini og dakong problema.
Ngano man?
Tungod sa walay pagtagad sa mga balaod sa kinaiyahan, labi na gyod ang gitawag og 20-meter salvage zone, apil ang pagseguro nga dili na hugaw ang tubig nga ibuga padung sa dagat gikan sa mga kabalayan og mga nag-negosyo duol sa baybayon, dunay dakong posibilidad nga mosunod ang Panglao Beach sa gihimong pagsara sa Boracay.
Dili pa lang dugay, usa ka dakong opisyal gikan sa Office of the President mibisita sa Alona Beach sa Panglao og gitan-aw kon tinuod ba kadtong binayran nga pahina diin ilang gi-anunsiyo nga boluntaryo nila nga giguba og gitangtang ang mga gipangtukod nga mga building nga nasulod sa 20-meter salvage zone.
Diha pay litrato sa usa ka Backhoe nga gusto ipakita nga mao kini ang gigamit sa pag-guba sa maong mga building.
Nahingangha ang opisyal tungod kay dili diay tinuod ang napatik nga anunsiyo tungod kay bisan tan-awon karon, anaa lang gihapon ang mga building nga nasulod sa 20-meter salvage zone.
Wala diay kini sila bungkaga og padayon gihapon kini sila nga nag-negosyo. Hasta gani ang karsada nga gamiton sa mga sakyanan og sa mga turista padung sa Alona Beach hilabihan ka piot og maglisod pag-agi ang duha ka sakyanan nga moagi niini.
Gani, nagduda ang opisyal nga walay gihimo ang lokal nga pangagamhanan mahitungod sa sistema sa hugaw nga mga tubig gikan sa kasilyas, swimming pool ug uban pa nga mga hugaw nga tubig gikan sa mga nanimuyo sa maong lugar.
Matod pa sa opisyal, wa man gani matagad ang sitwasyon sa kalsada nga makita, unsa na kaha ang mga drainage nga dili makita.
Kon moabot sa atensiyon ni Tourism Secretary Berna Puyat kining maong sitwasyon sa Alona Beach, labi na gyod kon moabot kini ni PRRD, unsa kahay mahitabo?
Matod pa ni Sec. Puyat dili pa lang dugay, pabor siya nga sirad-an ang Panglao Beach sa mga turista aron malimpiyohan kini sama sa gihimo didto sa Boracay.
Malikayan sab ang dugang kadaot sa kinaiyahan kon buhaton kini.
Gawas pa niini, unsay nahitabo sa Mayor sa Malay sa dihang mipagawas og Order si PRRD?
Gitangtang kini og gikasohan.
Manghinaot kita nga dili lang kini mahitabo og buhaton gilayon sa kagamhanan sa Panglao ang paglimpyo sa Alona Beach, apil ang ubang mga resorts sa Panglao Island.
Manghinaot sab kita nga hugot nga ipatuman sa kagamhanan sa Panglao ang pagpasunod sa balaod batok sa hugaw nga tubig nga modagayday sa dagat.
Manghinaot sab kita nga ang mga ahensiya sa kagamhanan sama sa DENR, DOT ug ang DILG, apil ang kagamhanang probinsiyal, mopasunod usab sa ilang mandato sumala sa balaod.