DI NA unta ako maghisgut bahin sa mga investment companies nga napasira sa gobyerno sa niaging bulan, apan di sab ako makaako nga di nalang ihatud kaninyo ang mga panghitabo labot niini sa atong palibot.
Naalarma naman gud ako sa nahitabo nga pagpanghulga sa mga biktima ngadto sa mga agents, personahe, ug tag-iya sa mga investment companies.
Gani, duna nay gipusil nga staff sa Ever Arm Any Marketing nga si Danilo del Campo Roberos, 36-anyos, ulitawo, alas 12:10 sa udto niadtong Sabado.
Ang biktima nahagba human pusila sa wa pa mailhing mga tawo dihang mikanaog sa ilang sakyanan sa Circumferential Road corner Suaybaguio, Barangay Magugpo North.
Migula sa inisyal nga imbestigasyon sa Tagum City Police nga maniudto unta ang biktima uban ang ilang manager nga si Josephine B. Besina, 49-anyos, apan wa niya damha nga pusilon siya.
Gawas niini, giransak sab sa mga biktima ang balay sa tag-iya sa Forex diin gipanghakot ang mga butang, bugas, ug giapil pa ang mga sakyanan.
Didto sab sa among lugar, nagtagu-tago na ang pipila sa mga agents ug lecturer sa KAPA Community Ministry International, Inc. tungod kay dunay hulga sa ilang kinabuhi.
Kinsa ba guy malipay nga mga biktima nga wa may nabalik sa ilang investments.Tungod kay dako ang nawala nga kwarta, natural nga maaburido ang utok, mopatay na og tawo kay dako ang investment.
Kinsa ang mabasol?
Di nato mabasol ang mga biktima tungod kay nagtuo man gyud sila nga legal kining mga negusyoha.
Ang mabasol nato kining mga local government units (LGUs) nga nagpasagad sa ilang trabaho pinaagi sa wa pagsusi og maayo sa mga dokumento nga gisumite ning mga investment companies.
Kay kung gihimo pa sa LGUs ang ilang trabaho sama dinhi sa siyudad sa Davao, labing seguro nga di gyud makapanapi ang mga mapahimuslanon nga tawo gamit ang pyramiding schemes.
Karon kay nahitabo naman ni, atong gihangyo ang Department of Interior and Local Government (DILG) nga mohimo og aksyon sa mga mayores nga wa mipatuman sa balaod, hinuon niayuda pa sa mga investment company owners.