Guadalupe way kasungian sa mga silingan
ANG Cebu City Sangguniang Panlungsod (SP) ni-certify nga way kasungian sa utlanan nga nagkalambigit sa Barangay Guadalupe ug sa iyang mga kasikbit nga niabot duha sa Konseho ug wa pa mahukmi.
Niisyu kini sa certification human sa request sa Commission on Elections (Comelec) south district office human ang Comelec-Manila nimando sa pagsusi.
Kon ang Guadalupe dunay kasungin sa kasikbit nga mga barangay labot sa ilang mga teritoryo ug kini wa pa masulbad, ang plebisito nga gitakda sa Marso 13 alang sa pagmugna sa Brgy. Banawa Englis kuyaw nga mauswag.
Kini tungod kay ang buhatan ni Comelec Deputy Executive Director for Operations Bartolome Sinocruz Jr. nimando nga ang problema resolbahon sa di pa mapahigayon ang plebisito, matod ni Elections Officer Edwin Cadungog.
“Ang ingon nga kung naay existing (conflict), i-suspend gyud (the plebiscite) until such time ma-resolve,” siya niingon.
“Kung unsay atong recommendation ngadto sa operations office mag-depende sa certification from the SP secretary,” nidugang si Cadung.
Matod niya nga nipadala na siyag komunikasyon kang Atty. Jose Marie Poblete, city council secretary, nga nangayog a certification.
Ang Guadalupe ug Labangon nagkasungi na kaniadto sa ilang komon nga mga utlanan.
Sa laing interview, however, si Poblete niingon nga wa silay records nga dunay kasungian nga niabot sa city council.
Matod niya nga ang certification nga iyang luwatan mag-ingon nga way kamatuoran nga magpakita nga dunay kasungian sa utlanan tali sa Guadalupe nga niabot sa city council.
“As far as our records are concerned, wala man. No boundary dispute has reached the city council for resolution,” nidugang si Poblete.
Sa milabay nga press conference, si Rep. Antonio Cuenco (Cebu City, south district) nipresentar og certification nga si Labangon Barangay Captain Felix Abella ug barangay councilors wa pagsupak sa pagbuwag sa Sitios Banawa ug Englis sa Guadalupe. (Sun.star Cebu)