GIHANGYO ni Mayor Oscar Moreno si kanhi Senate President Aquilino Pimentel Jr. nga mangulo sa inaugural ceremony niini kauban ang iyang mga kapartido niadtong Hunyo 30 sa Kiosko Kagawasan, Divisoria, siyudad sa Cagayan de Oro.
Una na nga nagpahigayon og pagpanumpa sila si Moreno kauban usab ang mga kapartido niadtong Hunyo 12 nga gipangulohan ni Presidente Rodrigo Duterte,
kinsa giingong una na nga misaad nga maoy magpapanumpa ilabi na nga kung modaug ang gisuportahang kandidato nga si Gerlie Balaba ubos sa partido ni Moreno.
Giingong usa ka dakong dungog alang niini nga mismo ang Presidente sa nasud maoy nagpapanumpa kanila apan buot ni Moreno nga manumpa usab kang Pimentel tungod na kay naandan na niini sa iyang una ug ikaduhang termino ug kini usab maoy inspirasiyon sa pagpanerbisyo sa katawhan.
“It was an honor to have been inducted into office by the President pero naghangyo ako kay Senator Nene,” matud ni Moreno.
Samtang gipahalipayan usab ni Pimentel sila si Moreno ug mga kauban lakip na usab ang mga Kagay-anon sa subling pagpili ug paghatag og laing termino ngadto kang Moreno.
“Gusto kong i-congratulate ang atong mabuot nga Mayor sa Cagayan de Oro ug mga lungsoranon sa Cagayan de Oro nga ilang gisublian sa bag-ong term ang Mayor sa Cagayan de Oro,” matud ni Pimentel.
Dako usab ang pasalamat ni Moreno sa katawhan sa pagsuporta kaniya ug pagpangga ug nanghinaot nga mas daghan pa ang mahimo niini.
“Kini atong final term, I hope we can do more in the three years nga I think are very important in Cagayan de Oro’s next chapter, becoming a metropolitan city and becoming the prime city of the south, mga damgo sa atong mga ginikanan,” dugang ni Moreno.