NAGHANGYO si kanhi Senate President Aquilino Pimentel Jr. nga ibalhin ang ngalan sa Cagayan de Oro Convention Center ngadto na sa Magtajas Convention Center isip pasidungog sa kanhi Mayor nga si Pablo "Ambing" Magtajas.
Atol sa pagbisita ni Pimentel sa siyudad sa inagurasiyon sa maong convention center, gibutyag niini nga hangyuon si Mayor Oscar Moreno ug ang konseho nga kung mahimo, mabalhin na ang ngalan ug mahuman na kining convention center aron nga mapahimoslan na kini sa katawhan.
“Atong hangyuon si Mayor Oca ug ang konseho nga balhinon ang ngalan, Magtajas Convention Center. Kabawo mo og ngano? Kay sa tinuod pagkasulti, si Ambing daghan ng nahimo sab sa Cagayan, mao mas maayo tingali nga ato siyang pasidunggan nga kanang convention center ibalhin nato sa iyang ngalan,” matud ni Pimentel.
Samtang gibutyag ni Moreno nga una na nga naghangyo kaniya si Pimentel sa wala pa ang eleksiyon nga inagurahan ang convention center ilabi na nga nag-edad na kini og 85 anyos.
Dili usab supak si Moreno ug walay problema alang kaniya ang paghangyo ni Pimentel nga ibalhin ang ngalan sa maong convention center ug nanghinaot nga mopasa kini diha sa 19th City Council.
“Wala may problema and I think we’re going to do that timing-timing lang kay especially on the part of Councilor Suzzete, di niya gusto nga self-serving. I think ang delicadeza on the part of Councilor Suzzete but I hope nga that will get pass in this council,” matud ni Moreno.
Gidugang pa ni Moreno nga kini ang pinakagarbo usab nga panahon sa tanan ilabi na nga ginagurahan na ang maong convention center.
Ang maong convention center gisugdan niadtong tuig 2000 diin dunay alokasiyon nga P125,000,000, samtang sa tuig 2001 ug sa sumusunod nga katuigan, duna kini alokasiyon nga anaa sa P406,967,500.
Ug tuig 2012 usab naabandona kining maong center tungod na usab kay gi-kwestiyon ang nanag-iya sa yuta nga gitukoran ug sa 2017 ang maong proyekto napadayon diin dunay pundo nga P350,000,000 ug dugang nga P100,000,000 diin napagawas pinaagi sa General Appropriation Act FY 2018.
Anaa sa P1,533,312,500 ang total nga project cost, samtang ang total funded amount anaa sa P984,937,500 samtang ang balance of work anaa sa P548,375,000 aron hingpit na kining magamit.
Ang maong convention center anaa na sa 87.81 percent nga natapos base sa total budget nga napagawas ug 56.41 percent sa total nga gibana-banang kantidad sa maong proyekto.
Mokabat usab sa 7,700 nga indibidwal ang ma-akomodar sa building complex lakip ang main building, car park building, restaurant/pavilion/administrative building, Tieza office building, power house, sewage treatment plant (STP) facility, material recovery facility (MRF), guard house, ug pump house.
Giingong ang Tourism Infrastructure and Enterprise Zone Authority (Tieza) ang magdumala niini kung hingpit na kining magamit.