Bagahi ni ALA fighter Villanueva nawagtang

GAWAS sa makaluya ug halayo nga biyahe gikan sa Sugbo paingon sa Kazakhstan, si ALA fighter “King” Arthur Villanueva nakasugat og laing kahasol pipila ka mga adlaw sa dili pa siya mosagubang og world title fight gumikan kay nawagtang ang iyang bagahi.

Sa interbyu sa SunStar Cebu, nagkanayon si Villanueva nga kaya ra niyang antuson ang kalayo sa biyahe apan lisod alang kaniya ang pagkawagtang sa iyang bagahi gumikan kay naa didto ang tanan niyang gikinahanglan lakip na ang iyang workout gear, fighting trunks, sapatos, ug weighing scale.

Gipasabot ni Villanueva nga wala siya naka-workout gikan sa iyang paghiabot sa Astana niadtong Lunes.

Si Villanueva, 30, mosuway pag-ilog sa korona ni World Boxing Council (WBC) bantamweight champion Nordine Oubaali karong Sabado sa Barys Arena sa Astana.

Giangkon ni Villanueva, kinsa ranked No. 15 sa WBC, nga gibati na siya og pressure gumikan kay wala niya nasusi ang iyang timbang.

Nagduda si Villanueva nga nawagtang ang iyang bagahi sa usa sa mga nasod nga nahilakip sa connecting flights nga iyang nasakyan. Ning-agi ang iyang biyahe sa Hong Kong, Dubai ug Moscow.

Kauban ni Villanueva sa biyahe mao ang iyang trainers nga sila si Edito Villamor, Edmund Villamor ug Michael Domingo.

Kini maoy ikatulong higayon nga manuktok si Villanueva alang sa world title.

Sa premiro niyang pagsuway, napilde siya pinaagi sa technical decision batok ni McJoe Arroyo sa ilang inilugay sa bakanteng International Boxing Federation (IBF) super flyweight belt niadtong 2015.

Sa ikaduha niyang pagsuway, napilde na sab si Villanueva ug ning higayuna pinaagi sa unanimous decision batok kang Zolani Tete sa ilang inilugay sa interim World Boxing Organization (WBO) bantamweight championship niadtong 2017. (EKA, ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph