DI KO sakop sa Kapa-Community Ministry International, Inc.. Gikan pa ni Adan wa gyud ko kaila niining Pastor Joel Apolinario, apan nadani ko sa iyang tuyo ug misyon: Datuon ang Kabos.
Mahimong tawgog investment ang donasyon sa matag sakop. Apan di pangilad ang tubo nga 30 porsinto kay nahatag man sa investor matag buwan.
Maagid-agid lang, apan di lunsay pyramiding nga ang nanag-una maoy makadawat dayon uwahi ang nanagsunod. Kon maputol ang networking pusgay ang paglaom makadawat.
Mao ni akong nasabtan. Mga donasyon gipuhonag mga negusyo. Angayng mahibaw-an nga way bugto kini. Sa ato pa, duha ang tinubdan sa tubo: ganansiya sa negusyo ug abot-abot nga donasyon.
With proper fund management, way di kadawat sa tubo kada buwan. Ang pangutana lang mohangtod ba ang kamatinud-anon sa fund managers o ang mosunod kon wan- a si Pastor Apolinario.
Di unta gukdon dayon sa kagamhanan. Ang maayong himuon mao ang pagtawag kang Pastor Apolinario ug gayran sa legal nga pamaagi sa pag-atiman sa kuwarta.
Ang mga pulitiko sa kampanya sigeg bandilyo nga ilang purilon ang kawad-on (poverty). “We will eradicate poverty!”Nangadato unya nangamatay na lang, wa gyud kasulbad sa kakabos.
Naay pundok nga nagpakitag paagi sa pagsulbad sa kawad-on maoy tabangan unta di kay pada ang kagamhanan sa bunghog sa ubang tawo nga nasuya sa kalampusan sa Kapa.
Naay mga religious sect sigeg kolektag donasyon diin ang nadato mao ra ang nangulo. Kini sila ang tinuod nga nangilad nga angay kuhaan sa maskara.
Wa pay sakop nga nireklamo sud sa duha ka tuig nga operasyon, sa ato pa way trampas nga nahimo ang Kapa sa iyang misyon. May sipyat lang si Apolinario.
Kini ang pagbutang sa tanang negusyo sa Kapa sa ngalan sa iyang asawa. Naghatag nig pagduda sa tinuod nilang tumong sa pundok. Makapatingkag sad ni sa dunggan.
Minilyon na ang mga sakop sa Kapa. Tiamo na kon kini sila madato. Unya, manakod ug manakod. Mahaw-as ang nasod gikan sa bung-aw sa kakabos.