ARON mabutangan og igong health personnel ang matag health center sa barangay sa Central Visayas, aduna’y bag-ong mga nurses, dentists, midwives ug ubang health personnel ang ipangdestino sa Department of Health (DOH) 7 sa pipila ka mga dapit sa rehiyon.
Martes, Hulyo 2 dihang nanumpa ang 1,800 ka mga re-hired ug bag-ong hired nga mga personnel atubangan ni DOH Assistant Secretary Abdullah Dumama Jr.
Matod ni Dumama nga usa kini sa ilang lakang sa pagpatuman na unya sa Universal Health Care Law.
“This is the answer to the promise of the President (Rodrigo Duterte) na dapat merong isang health personnel sa isang barangay. We may not be achieving all of that, pero somehow we can now be managing more than we expected,” matod ni Dumama.
Dugang niya nga sagad sa butangan nila og health personnel kining nasuta nga Geographically Isolated and Disadvantage Areas (GIDA) sa rehiyon.
Gibutyag usab sa opisyal nga gihimo kini nila aron mahatagan og dekalidad nga serbisyo sa panglawas ang matag Pilipino.
“This is a clear manefestation that Department of Health is really bent on implementing fully the Universal Health Care Law.”
Dili lang sa Central Visayas kini gihimo, apan lakip na usab ang ubang mga rehiyon sa nasod.
Nagkinahanglan og 2,200 ka mga health personnel ang DOH 7 aron mabutangan og igong personnel ang health centers.
Gibutyag usab ni Dumama nga aduna’y pagahimuon nga public hearing sa Sugbo sunod semana kabahin sa Universal Health Care Law karon nga gihuwat na lang ang Implementing Rules and Regulation sa bag-ong balaod.
Ang balaud bag-ohay lang gipirmahan ni Duterte. (HBL)