PAGHIMO’G mga balaudnon nga magtabang sa mga senior citizen, mga kababayen-an, sa urban poor sector, kabataan, ug mas business-friendly nga siyudad maoy panawagan ni Bise-mayor Alan Bucao atol sa Inaugural session sa 7th Sangguniang Panlungsod sa dakbayan sa Talisay.
Kagahapon, Hulyo 2, adlawng Martes gipahigayon ang ilang unang session diin iyang gipadungog ngadto sa iyang mga kauban sa konseho ang mga nahisgutan sa unahan lakip na ang paghimo og balaudnon nga magtabang sa mga senior citizen nga aduna pay makuhaan sa ilang inadlaw-adlaw nga panggasto alang sa tambal ug tabang sa pamilya, dili lang pinaagi sa pension ug financial assistance gikan sa lokal nga pangagamhanan.
Gipasabot ni Bucao nga mahatagan usab og kahigayonan nga madawat sa panrabaho ang mga senior citizen. Ingon ni Bucao nga kon nahimo kini sa ubang nasod, way rason nganong dili kini mahimo sa siyudad sa Talisay.
Buot usab niya matabangan ang kababayen-an alang sa hustong pagtudlo kalabot sa pagdumala diha sa kabalayan o proper household management, ug mga programa/proyekto nga alang sa kabataan.
Tinguha niya nga mas mahimo pa nga business-friendly ang dakbayan, samtang mapalambo ang pananum sa mga utanon ug prutas sa ubang Talisaynon.
Niini, iyang gihangyo ang iyang kauban nga tabangan siya sa pagpanday niini.
Iyang gilakbitan ang pagpa-institutionalize sa Public Employment Services Office (PESO).
“My dear fellow legislators, the sectors, that I have mentioned, need our assistance and sincere service. For them, we shall make our creative imagination function efficiently in order that we will be capable of helping them (Talisaynon),” tipik sa inaugural speech ni Bucao.
Lakip sa nihangyo sa konseho atol sa unang session, mao si Mayor Gerald Anthony ‘Samsam’ Gullas, kinsa niladlad pagbalik sa iyang 8-point agenda diha sa panerbisyo nga naglakip sa edukasyon, trapiko ug Aksyon Agad nga programa sa pangagamhanan.
Hinuon ang konseho dali nga mipadayag sa ilang pagsuporta sa panawagan ni Bucao.
Atol sa session gi-aprubahan usab ang mga giduso nga chairmanship ug membership sa nagkadaiyang nga komitiba sa konseho.
Mismo si Gullas ang nihimo sa pagtaud sa mga SP pins ngadto sa mga konsehal. (FMD)