GIHULIPAN na ang hepe sa siyudad sa Talisay aron maoy mangulo sa nabakanteng Provincial Intelligence Branch ug Drug Enforcement Unit sa Cebu Police Provincial Office.
Si P/Lt. Col. Marlou Conag pulihan ni Police Maj. Orlando Carag Jr., ang kanhi aide de camp sa Police Regional Office 7 director. Kini sigon sa mando ni P/Col. Roderick Mariano, ang OIC sa Cebu Provincial Police Office.
Ang tanang mga personnel sa PIB gipangrelibohan ni P/Brig. Gen. Debold Sinas niadtong Hunyo.
Matod ni Mariano nga dili siya gusto nga malangay ang pagbutang niya og bag-ong personnel sa PIB nga mao usab ang modala sa drug enforcement unit aron makasugod na sila sa ilang trabaho nga mao ang paglusad og gubat batok sa illegal nga drugas.
“Since naa may order galing sa Region na mga new officers na ma assign dito, so pwede na ako maglagay doon sa mga vacant, like the PIB. So ilalagay natin doon ang chief of police ng Talisay City. He will be the one to head the PIB,” matod ni Mariano.
Gimando ni Mariano sa molingkod nga hepe sa siyudad sa Talisay nga tutukan niini ang problema sa illegal nga drugas tungod kay ang maong dakbayan naila na nga daghan ang mga nalambigit niini.
Masaligon si Magno ngadto kang Carag tungod kay usa kini ka maayo nga police official ug andam usab nila kini nga abagan ilabi na ang pagpuhag sa illegal nga drugas sa maong siyudad.
Gihatagan usab og higayon nga makapili si Conag nga makapili sa iyang sakop nga walay bahid sa bisan unsa nga illegal nga kalihukan.
Wala pa matino, matod sa CPPO Director, kung aduna bay magpabilin niadtong mga personnel sa PIB nga gipangrelibohan sa katungdanan human sa nahitabong mis-encounter sa Barangay Sudlon 1, Cebu City.