TULO ka mga adlaw human sa iyang paglingkod, gipahibawo na ni Mayor Edgardo Labella ang iyang mga prayoridad sulod sa iyang unang termino isip amahan sa Dakbayan sa Sugbo.
Sa pagpamulong ni Labella sa hawanan sa Konseho atol sa inaugural session sa 15th Sangguniang Panlungsod nga gipangulohan ni Vice Mayor Michael Rama, iyang gibutyag ang 10 ka mga prayoridad nga mga programa ug proyekto sa mosunod nga tulo ka mga tuig.
Laing una sa listahan sa bag-ong mayor mao ang pagsulbad baha nga masinati sa dakbayan matag bunok sa uwan.
Si Labella niingon nga kinahanglan nga makig-alayon ang City Government sa Department of Public Works and Highways (DPWH) ug silingan nga mga siyudad sama sa Mandaue ug Talisay para mapahigayon ang subsob nga pagpalawom sa agianan sa tubig sama sa sapa.
Ikaduha mao ang business landscape diin tinguhaon sa Labella administration nga mapadali og release ang mga business permit sulod sa 15 ka adlaw.
Si Labella gusto nga adunay mapasar nga balaod sa konseho aron paspas ang paghikay sa mga dokumento sama sa digital system sa Mandaue ug Talisay City.
Gusto usab sa mayor sulod sa 45 ka adlaw, mahuman na og proseso ang building permit sa aplikante.
Ikatulo mao ang traffic, diin ilisan ang 30 ka tuig nga traffic light system sa Cebu City.
Hulipan kini og moderno ug digital traffic lights.
Ika-upat ang pagkolekta ug paglabay sa basura diin gihulagway ni Labella nga pakyas ang administrasyon ni kanhi mayor Tomas Osmeña bisan sa kapin P1 bilyon nga gasto sa tulo ka tuig nga termino.
Gusto usab niya nga bayran ang nahabiling utang sa City Government sa South Road Properties nga unang giplanohan niadtong 2015 sa panahon ni Rama, apan wa mosugot ang konseho nga gidomenar sa mga alyado ni Osmeña.
Ika-unom mao ang pagtiwas sa Cebu City Medical Center.
Gitahasan na usab niya si Kenneth Enriquez sa pag-audit sa naggasto sa CCMC ug ang hinungdan kon nganong nalangan paghuman.
Gusto usab sa mayor nga mahatagan og libreng uniporme ug pamahaw ang tanang mga tinun-an sa public school sa dakbayan subay sa balaod nga gipirmahan ni Presidente Rodrigo Duterte labot sa paghimo nga compulsory sa libreng breakfast.
Ikawalo mao ang pagtukod sa Cebu City College nga gihulagway sa mayor nga nauwahi ang Dakbayan.
Ang City Government subli nga nihingusog sa ilang suporta sa Philippine National Police (PNP) uban sa tinguha sa paggahin og pundo para sa katukoran sa mga police station hilabi na sa Police Station 5 ug 7 uban sa pagsuporta sa programa sa kapulisan para sa kahapsay ug kalinaw.
Katapusan mao ang paggahin og pundo para sa pagtiwas sa Carbon Market phase 2 nga nasugdan niadtong Rama administration.
Wa kini atimana sa tulo ka tuig ni Osmeña.
Gusto ni Labella nga mahatagan og desente nga tindahan ang mga vendor ug komportabli usab nga mamalit ang mga konsumidor. (PAC)